नेपाल बार एशोसियसनले कुनै पनि बहानामा निर्वाचन सार्न नहुने धारणा सार्वजनिक गरेको छ । 

आइतवार विज्ञप्ति जारी गर्दै बारेले निर्वाचन सारेर स्थानीय तहलाई रिक्त बनाए संविधान र कानूनविपरीत मात्रै नभई लोकतन्त्र र विधिको शासनको समेत उपहास हुन जाने बताएको हो । 

‘नेपालको संविधानले स्थानीय तह, प्रदेश संसद र संघीय संसद, राष्ट्रिय सभालगायतका निकायको आवधिक निर्वाचनको व्यवस्था गरेको छ, त्यस्ता निकायको शून्यताको परिकल्पना संविधान र निर्वाचनसम्बन्धी कानूनले गरेका छैनन्,’ विज्ञप्तिमा भनिएको छ, ‘कुनै आग्रह, पूर्वाग्रह, अनुकूलता, प्रतिकूलतालाई विचार गरेर निर्वाचन गर्ने नगर्ने भन्ने विषय हुन सक्दैन ।’

बारले सबै तहका निर्वाचन समयमै गरेर लोकतन्त्रको रक्षा र सम्वर्द्धन गर्ने कार्यमा लाग्न सरकारलाई अपिलसमेत गरेको छ ।