नामाङ्कन र सीमाङ्कनको विषय नटुंगाए चुनावमा बाधा पुग्ने प्रगतिशील पार्टीको धम्की

पूर्वमन्त्री हृदयेश त्रिपाठी नेतृत्वको जनता प्रगतिशील पार्टीले स्थानीय तहको चुनाव अगावै नामाङ्कन र सीमाङ्कनसम्बन्धी विवाद हल गर्न माग गरेको छ । यो विषय नटुंगाई गएमा चुनावमा बाधा उत्पन्न हुन सक्ने सो पार्टीले चेतावनी दिएको हो । 

प्रगतिशील पार्टीले आइतवार एक विज्ञप्ति प्रकाशित गरी स्थानीय तहको नामाङ्कन र सीमाङ्कन गर्ने आयोगको प्रतिवेदन मधेश प्रदेश बाहेकका जिल्लामा कार्यान्वयन गर्न माग गरेको हो ।

प्रदेश १, लुम्बिनी र सुदूरपश्चिम प्रदेशमा सो प्रतिवेदन कार्यान्वयन गरेर मात्र चुनावमा जान त्रिपाठीले माग गरेका छन् । 

जेठमा स्थानीय तहको चुनाव गराउने सत्ता गठबन्धनको प्रस्तावको त्रिपाठीले स्वागत गरेका छन् । 

गत प्रतिनिधि सभा निर्वाचनमा सूर्य चिन्हबाट चुनाव लडेका त्रिपाठी केपी ओली सरकारमा मन्त्री थिए । 

उनले हालसालै मात्र जनता प्रगतिशील पार्टी गठन गरेका हुन् ।