चुनावको मिति तत्काल घोषणाको माग गर्दै एमालेका भातृ संगठनहरूले जिल्ला प्रशासन कार्यालयमार्फत प्रधानमन्त्री शेरबहादुर देउवालाई ध्यानाकर्षण पत्र पठाएका छन् । 

रुपन्देहीका अनेरास्ववियु, राष्ट्रिय युवा संघ नेपाल, अखिल नेपाल महिला संघलगायतका २१ संगठनहरूले संयुक्तरुपमा  ध्यानाकर्षण पत्र पठाएका हुन् । 

उनीहरूले लोकतान्त्रिक व्यवस्थालाई सुदृढीकरण गर्नका लागि तत्काल निर्वाचन मिति घोषणा गरेर समयमै निष्पक्ष निर्वाचन गर्न सरकारसँग माग गरेका छन् । 

सोमवार एमाले निकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)ले चुनावको मिति घोषणाको माग गर्दै आन्दोलनका क्रममा सार्वजनिक गरेको थियो । 

सो कार्यक्रमअन्तर्गत सोमवार देशभरिका जिल्ला कमिटीले जिल्ला प्रशासन कार्यालयमार्फत तत्काल निर्वाचनको मिति तोक्न सरकारको ध्यानाकर्षण गराउने र  २५ जनासम्म जम्मा भएर तत्काल निर्वाचन गर्नका लागि क्याम्पस गेटमा कालो ब्यानर राख्ने अनेरास्ववियुले जनाएको थियो । 

यस्तै माघ १८ गते स्थानीय निर्वाचन घोषणा नगरे प्रतीकात्मक रुपमा प्रतिगामी सरकारका मन्त्रीहरू सहभागी कार्यक्रममा कालो झण्डा देखाउने, माघ १९ गते काठमाडौं र प्रदेश राजधानीहरूमा कानूनविदहरूको उपस्थितिमा सडक बहस गर्ने अनेरास्ववियुको भनाइ छ ।