नेकपा एमालेकी सचिव पद्मा अर्यालले एमसीसी संसदमा दर्ता भएको अवस्थामा मात्रै एमालेले आफ्नो धारणा स्पष्ट पार्ने बताएकी छन् । 

सोमवार नेकपा (एमाले)को केन्द्रीय कार्यालय टिमको बैठकपछि सञ्चारकर्मीहरूसँग संक्षिप्त प्रतिक्रिया दिँदै उनले एमसीसीको विषयमा सरकारले छलफल अगाडि बढाउन खोजेको भए पनि संसदमा दर्ता हुने/नहुने यकिन भने नभएको बताएकी हुन् । 

‘त्यो (एमसीसी) विषयमा अहिले छलफल गरिरहन हामीले उपयुक्त ठानेका छैनौँ,’ उनले भनिन्, ‘जतिबेला दर्ता हुन्छ, त्यो बेला नेकपा(एमाले)ले आफ्नो पोजिसन क्लियर गर्नेछ ।’

यस्तै स्थानीय तहको निर्वाचन वैशाख महिनाभित्रै गर्नुपर्ने भन्दै सरकारले निर्वाचन मिति छिटोभन्दा छिटो घोषणा गर्नुपर्ने बताइन् । 

‘स्थानीय तहको निर्वाचनका सम्बन्धमा पार्टीको स्थायी समितिको बैठकले आधिकारिक धारणा सार्वजनिक गर्छ । त्यही पनि विगतदेखि हामीले भनी नै आएका छौँ, स्थानीय निर्वाचन वैशाखको महिनाभित्र सक्नुपर्छ,’ उनले भनिन्, ‘त्यसैले छिटोभन्दा छिटो सरकारले घोषणा गरोस् भन्ने नेकपा(एमाले) को कुरा हो । हामी त्यो पक्षमा बारम्बार बोलिरहेका छौँ ।’ 

बुधवार बस्ने बैठकबाट पनि त्यो विषयलाई मुख्य रुपमा अगाडि बढाउने उनले जानकारी दिइन् । 

पार्टी महासचिव शंकर पोखरेलको अध्यक्षतामा बसेको केन्द्रीय कार्यालय टिमको बैठकले पार्टीको जिल्ला अधिवेशन र भर्खरै सम्पन्न भएको राष्ट्रिय सभा निर्वाचनको सम्बन्धमा समीक्षा गरेको सचिव अर्यालले जानकारी दिइन् ।