प्रधानमन्त्री शेरबहादुर देउवाले स्थानीय चुनावको मितिबारे निर्वाचन आयोगका पदाधिकारीहरूसँग आज छलफल गर्ने भएका छन् । छलफलका लागि आयोगका पदाधिकारीलाई मंगलवार अपरान्ह बालुवाटारमा बोलाइएको छ । 

जेठ महिनाभित्र स्थानीय तहको चुनाव गर्ने गरी मिति तोक्न सत्तारुढ गठबन्धनले सरकारलाई सुझाव दिएको थियो । सोहीअनुसार आयोगसँग छलफल गरेर चुनावको मिति तोक्ने गृहकार्यमा प्रधानमन्त्री लागेका हुन् । 

आज अपरान्ह बालुवाटारमा आयोगसँग छलफल गर्ने तय भएको प्रधानमन्त्रीका सहयोगीहरूले जानकारी दिए । प्रधानमन्त्री र आयोगबीच आजै छलफल गर्ने तयारी रहेको बालवाटार स्रोतले बतायो । 

निर्वाचन आयोगले यसअघि वैशाख १४ र २२ गतेको मिति प्रस्ताव गरेको थियो । 

प्रधानमन्त्री देउवाले भने जेठ पहिलो साताभित्र चुनाव गर्न प्रस्ताव गर्ने तयारी गरेका छन् । नेपाली कांग्रेसको बागमती प्रदेश समितिका पदाधिकारीहरूसँग सोमवार साँझ भएको भेटमा देउवाले जेठको पहिलो साताभित्र चुनाव गर्ने प्रस्ताव गरेका थिए ।