चालू आर्थिक वर्षको पहिलो ६ महिनामा नेपाल भित्रने रेमिट्यान्स रकम गत वर्षको सोही अवधिको तुलनामा ५.५ प्रतिशतले घटेको छ ।

रेमिट्यान्स आय यो अवधिसम्ममा ४ खर्ब ६८ अर्ब ४५ करोड रुपैयाँको छ ।

अघिल्लो वर्षको सोही अवधिमा भने रेमिट्यान्स आय ११.१ प्रतिशतले बढेको भने यो वर्ष भने घटेको छ ।

अमेरिकी डलरमा भने जम्मा ३ अर्ब ९३ करोडको रेमिट्यान्स पछिल्लो ६ महिनामा नेपाल भित्रिएको छ । यो रकम पनि गत वर्षको तुलनामा ६.२ प्रतिशतले घटेको हो ।

राष्ट्र बैंकका अनुसार पुससम्मको महँगीदर भने साढे ५ प्रतिशत मात्रै रहेको छ । अघिल्लो महिना यस्तो महँगी दर ७.११ प्रतिशतसम्म पुगेको थियो । 

वार्षिक बिन्दुगत उपभोक्ता मुद्रास्फीति पुससम्ममा ५.६५ प्रतिशत छ । अघिल्लो वर्षको सोही महिनामा यस्तो मुद्रास्फीति ३.५६ प्रतिशत थियो ।

यो अवधिमा खाद्य तथा पेय पदार्थ समूहको मुद्रास्फीति ४.९२ प्रतिशत र गैर–खाद्य तथा सेवा समूहको मुद्रास्फीति ६.२३ प्रतिशत रहेको छ पुससम्ममा सबैभन्दा बढी महँगी घ्यू तथा तेलमा रहेको छ । यी वस्तुमा २१.२२ प्रतिशतको मुद्रास्फीति दर रहेको राष्ट्र बैंकको प्रतिवेदनमा उल्लेख छ ।  

यो अवधिमा सरकारले गरेको खर्च भने ५ खर्ब ६ अर्ब ७० करोड रूपैयाँ रहेको छ । यस्तो खर्चमा चालू खर्च ४ खर्ब ६ अर्ब ४१ करोड रूपैयाँ र पुँजीगत खर्च भने ५० अर्ब ८१ करोड रूपैयाँ मात्रै रहेको छ । यसमा वित्तीय व्यवस्थाअन्तर्गतको खर्च ४९ अर्ब ४७ करोड रुपैयाँ रहेको छ । 

सरकारले ६ महिनामा ५ खर्ब ५२ अर्ब राजस्व संकलन गरेकोमा खर्च गरेर बाँकी रहेको रकम पुस मसान्तमा सरकारी खातामा दुई खर्ब ७७ अर्ब ८२ करोड रूपैयाँ रहेको पनि राष्ट्र बैंकको प्रतिवेदनमा छ । 

बैंकहरूमा निक्षेप कम कर्जा बढी

चालू आर्थिक वर्षको पुससम्ममा बैंक तथा वित्तीय संस्थाहरूले निक्षेप जम्मा ३.८ प्रतिशतले मात्रै बढाएका छन् । यो अवधिमा कर्जा प्रवाह भने १२.१ प्रतिशतले बढेको छ ।

यो अवधिसम्ममा बैंक तथा वित्तीय संस्थाहरूले १ खर्ब ६२ अर्ब रूपैयाँ निक्षेप संकलन गरेका छन् । 

यसबाट बैंकहरूले प्रवाह गरेको कर्जा भने ४ खर्ब ९४ अर्ब रूपैयाँ रहेको छ । यो अवधिमा राष्ट्र बैंकले पुनरकर्जाबापत बजारमा १ खर्ब ५८ अर्ब रूपैयाँ प्रवाह गरेको छ ।