कर्तव्य ज्यान मुद्दाका फरार प्रतिवादी ३७ वर्षपछि पक्राउ परेका छन् । 

ललितपुर गोदावरी नगरपालिका-१० सल्यानगाउँ ठेगाना भएका ५६ वर्षीय सुनबहादुर तामाङलाई बुधवार प्रहरीले पक्राउ गरेको हो । 

प्रहरीका अनुसार ललितपुर साविक चापागाउँ गाविस-८ सल्यानगाउँ बस्ने घटेरो कान्छो भन्ने गणेशबहादुर नगरकोटीलाई २०४१ चैत १२ गते राति कुटपिट गर्दा मृत्यु भएपछि तामाङ फरार थिए । 

उनलाई केन्द्रीय अनुसन्धान ब्यूरो महाराजगञ्जबाट खटिएको प्रहरीले उनकै घरबाट पक्राउ गरेको हो । 

सुनबहादुरमाथि कर्तव्य ज्यान मुद्दामा ललितपुर जिल्ला अदालतबाट २०४४ जेठ ५ गते साविक मुलुकी ऐन, अदालती बन्दोबस्तको महल १९० नम्बर बमोजिम मुद्दा मुल्तवीमा रहने गरी फैसला भएको थियो । उनलाई आवश्यक कारबाहीका लागि जिल्ला अदालत ललितपुरमा पेश गरिएको ब्यूरोले जनाएको छ ।