नेकपा एमालेका नेता एवं  सांसद भीम रावलले संसदमा एमसीसी टेबुल गर्दा संसदको विशेषाधिकार र नेपाली जनताको अपमान हुने बताएका छन् । 

संसदमा बोल्दै रावलले विदेशीको धम्कीसामु लम्पसार परेर एमसीसी संसदमा टेबुल गर्न लागिएको आरोप लगाएका हुन् ।

नेपाली जनता नेपालको स्वतन्त्रता, स्वाभिमानको पक्षमा काम गर्छ कि राष्ट्रघाती प्रावधान भएको एमसीसी सम्झौतालाई स्वीकार गर्छ भनेर हेरिरहेको रावलले बताए । 

उनले भने, ‘कहिल्यै कसैको अधिनमा नभएको, नेपालको कानून र संविधान मिचिने, भूभाग विदेशी कम्पनीको अधिनमा हुने व्यवस्थालाई कसरी संसदले स्वीकार गर्न सक्छ ?’ 

विपक्षी पार्टीले संसद अवरोध गरिरहेको अवस्थामा एमसीसी टेबल गरिन गैरजिम्मेवार काम हुने उनले बताए ।  

‘नेपालको स्वाधिनता, स्वाभिमान र आत्मनिर्णयको अधिकारसँग सम्बन्धित विषयमा प्रमुख राजनीतिक दलहरु बीचमा सहमति नभइरहेको अवस्थामा नेपाली जनताको भावना विपरीत टेबुल गरिने कुरा आपत्तिजनक छ,’  रावलले भने । 

प्राकृतिक स्रोतको बाँडफाँट गर्नुपर्ने लगायतको सम्झौता संसदमा ल्याउँदा दुई तिहाइ बहुमत चाहिने तर अहिले राजनीतिक दलहरुबीचमा कुरा नमिलिरहेको अवस्थामा एमसीसी संसद ल्याउन नहुने उनले बताए ।

‘देश कानूनी शासनबाट चल्छ कि विदेशी धाकधम्की सामु लम्पसार परेर, जनताको आवाज कुल्चेर जस्तो वातावरणमा टेबल गरिदै छ त्यो आपत्तिजनक छ,’ रावलले भने, ‘यो सार्वभौम नेपाली जनताको अपमान हो, संसदको अपमान हो । संसदको विशेषाधिकारको अपमान हो ।’