ईसेवाले बोनस बाँड्दैछ भन्दै ७ लाखभन्दा बढी रकम ठगी गरेको आरोपमा दुई जनालाई पक्राउ गरिएको छ । 

प्रहरीका अनुसार रौतहट माधवनारायण नगरपालिका–२ घर भएका हाल पर्सा वीरगञ्ज बस्ने सुभम साह र बारा महागढीमाई नगरपालिका–१० घर भई हाल वीरगञ्ज बस्ने सर्फराम आलमलाई ठगी आरोपमा पक्राउ गरिएको हो । 

प्रहरीका अनुसार उनीहरूले आफू ईसेवाको कर्मचारी बोलेको र ५० हजार रकम आफ्नो खातामा हालेमा २५०० बोनस पाइन्छ भन्दै मानिसहरूलाई रकम हाल्न लगाउने गरेका थिए । ईसेवा आईडीको ओटीपी प्राप्त गरेपछि बैंक खातामा समेत पहुँच पुर्‍याएर ७ लाख २७ हजार ३४८ रूपैयाँ ठगी गरेको प्रहरीले जनाएको छ । 

सो ठगी रकमले टिकटकमा बिक्रीका लागि राखिएको आईफोन १३ प्रो म्याक्स एक लाख ९० हजारमा किन्ने सहमति गरी पीडितको खाताबाट सिधै मोबाइल बिक्रेताको खातामा रकम रकमान्तर गरिएको पाइएको प्रहरीले जनाएको छ । 

साथै विभिन्न सामान किन्न अन्य व्यक्तिहरूका खातामा समेत रकम पठाएको पाइएको प्रहरीले जनाएको छ । 

ती व्यक्तिहरूलाई जिल्ला प्रहरी कार्यालय पर्साको समन्वयमा पक्राउ गरेर आवश्यक कारबाहीका लागि महानगरीय प्रहरी परिसर काठमाडौं पठाइएको प्रहरीले जनाएको छ ।