१ नम्बर प्रदेश सरकारका मुख्यमन्त्री राजेन्द्रकुमार राईले नामकरणको विषयमा लचकता अपनाउन दलहरूलाई अनुरोध गरेका छन् ।

सरकारले राखेको सर्वदलीय बैठकमा मुख्यमन्त्री राईले संसदमा प्रतिनिधित्व गर्ने दलहरूले लचकता अपनाए मात्रै प्रदेशले नाम पाउन सक्ने बताए ।

पार्टीको निर्देशन अनुसार नै पार्टीको धारणा लिएर नै सांसदहरू अगाडि बढ्ने भएकाले नामको टुंगो लगाउन दलको भूमिका सबैभन्दा महत्त्वपूर्ण हुने उनले बताए ।

अब पनि नाम टुंगो लगाउन नसके लाज हुने उनले बताए । ‘एउटा पहिचान र अर्काे भूगोल, मिश्रित पहिचानको अडानमा रहने हो भने नामको विषय टुंगोमा पुग्न सक्दैन,’ उनले भने, ‘मेरो गोरूको बाह्रै टक्का भन्ने अडान छाडेर नामकरणको विषयमा सहयोग गरिदिनुहोस् । सरकार सहजीकरण र समन्वय गर्न तयार छ ।’ भूगोल तथा पहिचान जे आधारमा भए पनि सहमतिका आधारमा टुंगो लगाउन पहल गरिदिन उनले आग्रह गरे ।

बैठकमा नेकपा एमालेका प्रदेश कमिटी अध्यक्ष तुलसी न्यौपाने, नेपाली कांग्रेस प्रदेश सभापति उद्धव थापा, नेकपा एकीकृत समाजवादीका प्रदेश कमिटी अध्यक्ष बलदेव चौधरी, नेकपा माओवादी केन्द्रका प्रदेश अध्यक्ष हर्कबहादुर नेम्वाङ, राष्ट्रिय लोकतान्त्रिक मञ्चका अध्यक्ष कुमार लिङ्देन, जसपाका केन्द्रीय उपाध्यक्ष राजकुमार यादव लगायतका नेता सहभागी भएका छन् ।