प्रतिनिधि सभा बैठक स्थगित भएपछि प्रधानमन्त्री शेरबहादुर देउवा प्रमुख प्रतिपक्षी दल नेकपा एमालेका अध्यक्ष केपी शर्मा ओलीसँग छलफलमा जुटेका छन् ।

कांग्रेस र एमालेका दोस्रो तहका केही नेताहरूलाई समेत राखेर बानेश्वरमा ओली र देउवाबीच छलफल भइरहेको हो ।

एमालेसँग छलफलका लागि भन्दै प्रधानमन्त्री देउवाले संसद् बैठक स्थगित गर्न सभामुख अग्निप्रसाद सापकोटालाई आग्रह गरेका थिए ।

देउवाकै आग्रहमा सूचना टाँसेर बैठक भोलिसम्मका लागि स्थगित भएको छ । बैठक स्थगित भएलगत्तै प्रमुख प्रतिपक्षी दलका नेता केपी शर्मा ओलीको कार्यकक्षमा छलफल शुरू भएको हो ।

छलफलमा एमालेबाट ओलीका अलावा ईश्वर पोखरेल र सुवास नेम्वाङ तथा कांग्रेसबाट महामन्त्री गगन थापा र ज्ञानेन्द्रबहादुर कार्कीलगायत सहभागी छन् ।

एमसीसी पारित गर्न सत्ता साझेदार नेकपा माओवादी केन्द्र र नेकपा एकीकृत समाजवादीबाट साथ नपाएपछि देउवाले एमालेको साथ खोजेका हुन् ।

एमाले भने एमसीसीमा सघाउनुअघि सत्ता गठबन्धन टुट्नुपर्ने अडानमा छ ।