संकटको डिलमा पुगेको सत्तारूढ गठबन्धनमा नयाँ राजनीतिक परिस्थिति तयार भएको छ ।

माओवादी केन्द्र र एकीकृत समाजवादी पार्टीले एमसीसी अनुमोदन हुन दिने र गठबन्धन पनि जोगाउन सहमत भएपछि गठबन्धन कायम रहने देखिएको हो । 

नेकपा माओवादी केन्द्रले गठबन्धन जोगाउने शर्तमा संसद बैठक बहिस्कार गरेर एमसीसी अनुमोदन हुन दिने रणनीति बनाएको छ ।

बैठकमा सहभागी एक नेताले भने, ‘गठबन्धन जोगाउन अन्तिम प्रयास गर्ने निर्णय भएको  छ । एमसीसी र गठबन्धनबारे पार्टीको पछिल्लो पोजिसन प्रधानमन्त्रीलाई जानकारी गराएका छौं । प्रधानमन्त्रीले ग्रीन सिग्नल दिनुभएको छ ।’

बैठकमा अध्यक्ष पुष्पकमल दाहाल प्रचण्डले केन्द्रीय सदस्यहरूलाई सरकारबाट बाहिरिने कि एमसीसी अनुमोदन हुन दिएर सरकार जोगाउने विषयमा सल्लाह मागेका थिए । 

बैठकमा सहभागी मन्त्रीहरुले बरू बैठकमा सहभागी नभएर पनि गठबन्धन जोगाउनेबारे पहल गर्न पार्टी अध्यक्ष प्रचण्डलाई सुझाव दिएका थिए ।

मन्त्रीहरुले दिएको सुझावमा अरू नेताहरुले सहमति जनाएपछि प्रचण्डले पार्टीको पोजिसनबारे प्रधानमन्त्रीलाई जानकारी गराएका थिए ।

प्रधानमन्त्री देउवाले आजै छलफलका लागि बालुवाटार बोलाएका छन् । प्रचण्डको सचिवालयका अनुसार आज साँझसम्ममा प्रधानमन्त्री देउवा र माओवादी अध्यक्ष प्रचण्डको बालुवाटारमा संवाद हुनेछ । 

कांग्रेस र एमालेको नयाँ समीकरण बन्न सक्ने अवस्थालाई मध्यनजर गरेर एमसीसी अनुमोदन हुँदा माओवादी र एकीकृत समाजवादीको अवरोध सिर्जना नगर्ने भएका हुन् ।

संसद बैठकमा एमसीसी निर्णयार्थ प्रस्तुत हुँदा दुई पार्टीले बैठक बहिस्कार गर्ने र कांग्रेस तथा लोकतान्त्रिक समाजवादी पार्टीका सांसदले मात्रै एमसीसी अनुमोदन गर्न दिने गरी विकल्प तयार गरिएको माओवादी केन्द्रका नेताहरुले बताएका छन् ।

‘एमसीसीमा पार्टीको अडान राख्दै मध्यविन्दू खोज्ने बारे छलफल भएको छ । त्यसको लागि गृहकार्य पनि भइरहेको छ’, बैठकमा सहभागी माओवादी केन्द्रका अर्का नेताले लोकान्तरसँग भने, ‘गठबन्धन तोड्दा ओली (एमाले अध्यक्ष केपी ओली) हावी हुन्छन् । एमाले हावी हुँदा कांग्रेसलाई पनि फाइदा हुँदैन् । यसमा प्रधानमन्त्री सहमत छन् । गठबन्धन तोड्न हुन्न भन्नेमा प्रधानमन्त्रीलाई बुझाउँछौं ।’ 

संसद् बैठक बस्नका लागि एक चौथाइ सांसद अर्थात् ६८ जनाको उपस्थिति अनिवार्य हुन्छ । अहिले संसदमा २७१ जना सांसद छन् । 

कांग्रेसका ६३ सांसदमध्ये दुई जना उपचारका लागि भारतमा छन् भने दुई जना निलम्बित छन् । यसरी कांग्रेसको ५९ र लोकतान्त्रिक समाजवादी पार्टीको १३ जना गरेर ७२ जनाको उपस्थिति हुने हुँदा संसद् बैठक चल्न सक्छ । 

नेकपा एमालेले संसद् अवरोध गरिरहेको छ । एमालेले संसद् अवरोधका लागि वेलमा नारा लगाइरहेको अवस्थामा ध्वनि मत प्रक्रियाबाट एमसीसी अनुमोदन हुँदा एमालेको मत गणना हुँदैन ।

माओवादी र एकीकृत समाजवादीले बैठक बहिस्कार गर्दा कांग्रेस र लोसपाका सांसदले मात्रै एमसीसी अनुमोदन गराउन सक्छन् । 

गठबन्धन जोगाउने शर्तमा अन्तिम समयमा माओवादी केन्द्र बैठक बहिस्कार गर्न तयार भएको माओवादी नेताले बताएका छन् ।

माओवादी केन्द्रले एमालेलाई शक्तिमा आउन नदिन एमसीसी अनुमोदन भए पनि गठबन्धन नछोड्ने निष्कर्षमा पुगेको माओवादी केन्द्रका नेताहरू बताउँछन् ।

पार्टीको पछिल्लो पोजिसन बनाउनको लागि एकीकृत समाजवादी पनि बैठकमा जुटेको छ ।