नेकपा एमालेका महासचिव शंकर पोखरेलले सभामुख अग्निप्रसाद सापकोटालाई पदबाट हटाउन कांग्रेस सहमत हुनुपर्ने बताएका छन् ।

निर्वाचन आयोगमा निर्वाचन प्रयोजनका लागि दल दर्ता गरेपछि शुक्रवार सञ्चारकर्मीहरूसँग कुरा गर्दै पोखरेलले सभामुख सापकोटाले एमाले विभाजन गर्न भूमिका निर्वाह गरेकाले गल्ती सच्याउनुपर्ने बताएका हुन् ।

सापकोटाले पदीय दुरूपयोग गरेकाले उनले गल्ती नसच्याउँदा वा राजीनामा नदिँदासम्म संसद चल्न नसक्ने पोखरेलले बताए । 

सत्तारुढ गठबन्धनले आफ्नो पार्टीको माग सम्बोधन गर्नेबित्तिकै संसद सुचारु हुने र एमसीसीका विषयमा पनि पार्टीले आवश्यक निर्णय लिने पोखरेलको भनाइ छ । 

‘हाम्रा लागि सत्ता प्रधान प्रश्न होइन । हामी कुनै सरकारलाई परिवर्तन गरेर अर्को सरकार बनाउने मान्यताको पक्षमा पनि छैनौं,’ पोखरेलले भने, ‘लोकतन्त्र डिरेल भएको छ । लोकतन्त्रलाई सही बाटोमा हिँडाउने कुरा महत्त्वपूर्ण छ ।’

नेकपा (एमाले) र नेपाली कांग्रेस लोकतान्त्रिक मूल्य मान्यताको पक्षमा आधारभूत रुपमा सहमत हुनुपर्ने पोखरेलले बताए ।

‘विकास, समृद्धि, स्वाधिनता, परराष्ट्र नीति, र लोकतन्त्रको आधारभूत मूल्यमान्यताको पक्षमा आधारभूत समझदारीका साथ अगाडि बढ्नुपर्छ भन्ने हाम्रो प्रस्ताव छ,’ कांग्रेससँग भएको संवादबारे पोखरेलले भने ।

गठबन्धनले पार्टीको मागलाई सम्बोधन गर्ने बित्तिकै संसदको प्रक्रिया सुचारु हुने पोखरेलले बताए । 

‘संसदभित्र प्रवेश गर्ने हरेक बिजनेसहरूमा छलफल गरेर निर्णय प्रस्तुत गर्नका लागि तयार छौं,’ पोखरेलले भने ।