स्थानीय तह निर्वाचनका लागि अर्थ मन्त्रालयले ८ अर्ब ११ करोड रुपैयाँ बजेटको सुनिश्चितता गरेको निर्वाचन आयोगले जनाएको छ ।

आयोगका प्रवक्ता सहसचिव शालिग्राम शर्मा पौडेलले बिहीवार प्रेस विज्ञप्ति जारी गर्दै चुनावका लागि बजेट सुनिश्चित भएको जनाएका छन् ।

आयोगले स्थानीय तहको निर्वाचन प्रयोजनका लागि दर्ता हुन निवेदन प्राप्त भएका ८० वटा राजनीतिक दलको निवेदनका सम्बन्धमा जाँचबुझ भइरहेको जनाउँदै निर्वाचनमा भाग लिने राजनीतिक दलको नाम फागुन २६ गतेभित्र प्रकाशन गरिने जनाएको छ ।  

स्थानीय तह निर्वाचनमा खटिने मुख्य निर्वाचन अधिकृत तथा निर्वाचन अधिकृतहरूको नामावली सम्बन्धित निकायबाट प्राप्त भएको र अध्ययनको क्रममा रहेको समेत विज्ञप्तिमा उल्लेख छ ।

आयोगले आगामी वैशाख ३० गते स्थानीय चुनाव गर्दैछ । मतदाता नामावली अद्यावधिक (दाबी विरोध समेत) कार्यक्रम २०७८ अन्तर्गत मतदाता नामावलीमा रहेको त्रुटि सच्याउन निवेदन दिने, कसैले झूटा विवरण दिई नामावलीमा नाम समावेश गरेको भए सोको विरोधमा उजुरी दिने, कुनै मतदाताको नाम एकभन्दा बढी स्थानमा समावेश भएकोमा एक स्थानमा मात्र कायम गर्न निवेदन दिने, मृत्यु भएका वा नागरिकता त्याग गरेका मतदाताको नाम मतदाता नामावलीबाट हटाउनको लागि सूचना दिने, उजुरी परेको मतदातालाई प्रमाणसहित सफाइको मौका दिने जस्ता क्रियाकलाप फागुन २० गतेसम्म गर्न सकिने समेत आयोगले जनाएको छ ।