प्रहरी अतिरिक्त महानिरीक्षक (एआईजी)मा बढुवाका लागि ३ जनाको नाम सिफारिश भएसँगै रिक्त डीआईजी पदमा बढुवाका लागि एसएसपीहरूको दौडधूप शुरू भएको छ ।

मन्त्रिपरिषद्को फागुन १२ गते बसेको बैठकले एआईजीको दरबन्दी थप्ने निर्णय गरेपछि चैत १ गते गृह मन्त्रालयको सचिवस्तरीय बढुवा समितिले डीआईजीत्रय वसन्त पन्त, धिरजबहादुर सिंह र रवीन्द्रबहादुर धानुकलाई एआईजीमा बढुवाका लागि सिफारिश गरेको थियो ।

त्यसपछि डीआईजीको ३ वटा पद रिक्त भएको छ । यतिबेला डीआईजी हुने व्यक्तिमध्येबाट एक जना २०७९ चैतमा आईजीपी बन्ने सम्भावना समेत रहेकाले यसपटकको बढुवालाई निकै महत्त्वका साथ हेरिएको छ ।  

आगामी वैशाख १९ गते वर्तमान आईजीपी शैलेश थापा क्षेत्रीले अवकाश पाउँदैछन् । त्यसपछि अहिले एआईजी रहेकामध्ये एकजना ११ महिनाका लागि आईजीपी बन्नेछन् । एआईजी रहेका सबै आईजीपीका लागि दाबेदार हुने भए पनि विश्वराज पोखरेलको सम्भावना प्रबल छ ।

त्यसपछिको आईजीपी को बन्ने भन्ने कुरा पनि यसपटकको डीआईजी बढुवाबाटै संकेत मिल्ने छ ।

डीआईजीमा बढुवाका लागि २०७५ माघ २४ गते बढुवा भएका एसएसपीहरू सन्दीप भण्डारी, टेकप्रसाद राई, उमेशराज जोशी, श्यामलाल ज्ञवाली, रामदत्त जोशी, दीपक थापा, किरण बज्राचार्य, मीरा चौधरी, बुद्धिराज गुरुङ, पोषराज पोखरेल, टेकबहादुर तामाङ, वसन्तबहादुर कुँवर, भीमप्रसाद ढकाल लगायत प्रतिस्पर्धामा छन् ।

त्यसैगरी २०७७ वैशाख ९ मा बढुवा भएका एसएसपीहरू दुर्गा सिंह, हृदय थापा, विष्णुकुमार केसी, कुबेर कडायत, चन्द्र कुबेर खापुङ, सुदीप गिरी, राजेशनाथ बास्तोला, यज्ञविनोद पोखरेल पनि बढुवाका लागि प्रतिस्पर्धामा छन् । 

बालुवाटार स्रोतका अनुसार उमेशराज जोशी, वसन्तबहादुर कुँवर, सन्दीप भण्डारी, दीपक थापा र भीमप्रसाद ढकालमध्येबाट ३ जनालाई डीआईजी बनाउने तयारी छ ।

यसमध्ये पनि जोशी, कुँवर र थापाको सम्भावना प्रबल रहेको स्रोतको छ ।  

एसएसपी जोशी प्रधानमन्त्री शेरबहादुर देउवा निकट मानिन्छन् । उनी सुदूरपश्चिमकै हुन् । जोशीलाई प्रधानमन्त्रीकै चाहनामा महानगरीय ट्राफिक प्रहरी महाशाखा प्रमुख बनाइएको चर्चा हुने गरेको छ ।

कुँवर नेपाली कांग्रेसनिकट मानिन्छन् । अर्घाखाँची घर भएका उनलाई गृहमन्त्री बालकृष्ण खाँणले अगाडि ल्याउन खोजेको स्रोतको दाबी छ ।

विगतमा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ निकट मानिएका दीपक थापा प्रचण्डको कोटाबाट डीआईजी हुने सम्भावना छ । 

एमाले सरकारका पालामा महेश बस्नेत निकट रहेको भन्दै चर्चा भएता पनि पछिल्लो समय थापाले फेरि प्रचण्डसँग सम्बन्ध सुधारेको चर्चा छ ।