पूर्व प्रधानमन्त्री माधवकुमार नेपालले भूकम्पले क्षति पुर्‍याएका गोरखाको लाप्राक र बारपाकलगायतका क्षेत्रको विकासका लागि पहल गर्ने प्रतिबद्धता जनाएका छन् ।

नेकपा एकीकृत समाजवादी (सपा) पार्टी गोरखाले लाप्राकमा शुक्रवार आयोजना गरेको कार्यक्रममा बोल्दै पार्टीका केन्द्रीय अध्यक्ष समेत रहेका पूर्व प्रधानमन्त्री नेपालले लाप्राकसम्म सडकबाटो स्तरोन्नति, स्वास्थ्य, खानेपानी तथा बिजुलीको पहुँच पुर्‍याउन सम्बन्धित निकायमार्फत पहल गर्ने बताए ।

लाप्राकको नमूना बस्तीमा खानेपानीको अभाव भएको त्यहाँका नागरिकले गुनासो गरेपछि उनले राजधानी फर्किएर खानेपानी मन्त्रीलाई समस्याको जानकारी गराउने वचन दिए । ‘लाप्राकसम्म पुग्न सडकमा ढल, बाटो निर्माणको काम त भइरहेको छ,’ उनले भने, ‘यसलाई अझै गति दिनुपर्ने आवश्यकता छ ।’

उनले लाप्राकसम्म नेपाल विद्युत् प्राधिकरणको केन्द्रीय प्रसारण लाइन जडान छिटोभन्दा छिटो गर्नुपर्ने बताए ।

विकासका लागि जनता पनि चनाखो हुनुपर्नेमा पूर्व प्रधानमन्त्री नेपालले जोड दिए । ‘विकासका लागि सरकार र मन्त्रीलाई घच्घच्याउने काम मेरो हो,’ उनले भने, ‘तपाईंहरू पनि लाग्नुस्, सामूहिकतामा काम गर्न सकियो भने विकास सजिलै हुनसक्छ ।’