नेपाली सेनामा जागिर लगाइदिन्छु भनेर रकम ठगी गर्ने एक व्यक्तिलाई पोखरा प्रहरीले पक्राउ गरेको छ । 

आफू नेपाली सेनाको क्याप्टेन भएको भन्दै तीन जनालाई ९ लाख ७५ हजार १४० रूपैयाँ ठगी गरेको आरोपमा ओखलढुंगा मानेभञ्ज्याङ-५ घर भई पोखरा बस्ने धनबहादुर परियारलाई प्रहरीले पक्राउ गरेको हो । 

प्रहरीका अनुसार परियारले आफूलाई सहसेनानी अर्जुन कटुवाल भनेर चिनाउने गरेका थिए । उनले आफू मिसनका लागि विदेशमा रहेको र सिंगापुर पुलिस, नेपाली सेनाको सेकेन्ड लेफ्टिनेन्ट र सिपाही पदमा जागिर लगाइदिन्छु भन्दै फेसबुकबाट कुराकानी गरेर रकम ठगी गरेको प्रहरीले जनाएको छ । 

प्रहरीका अनुसार उनका साथबाट नेपाली सेनाको सहसेनानी अर्जुन कटुवालको नाममा बनाएको नक्कली परिचयपत्र, सहसेनानीको दर्ज्यानी चिह्न र अर्जुन कटुवाल नै नामको चेसप्लेट भएको चुस्ता, हरियो ज्याकेट, बेल्ट, दापसहितको खुकुरी, तुमलेट, सेनाको लोगो भएको गेमड्रेस र ट्रयाकसुटलगायत बरामद गरिएको छ । 

त्यस्तै विभिन्न व्यक्तिहरूको नामको उपसेनानी पदको उम्मेदवारहरूको फाराम, सिपाही पदको परिचयपत्र, खाली परिचयपत्रहरू र एउटा मोटरसाइकलसहित उनलाई पक्राउ गरिएको प्रहरीले जनाएको छ । 

कास्की जिल्ला अदालतबाट ७ दिनको म्याद थप गरी अनुसन्धान प्रक्रिया अगाडि बढाइएको प्रहरीको भनाइ छ ।