रूपन्देहीको तिलोत्तमा नगरपालिका अन्तर्राष्ट्रिय गुणस्तर प्रमाणित नगरमा सूचीकृत भएको छ । 

मुलुकमै पहिलोपटक तिलोत्तमा नगरपालिकाले आफ्नो कार्यसम्पादनका विभिन्न ३६ वटा सूचक पूरा गरी युनाइटेड एप्लिकेसन फाउन्डेसन अमेरिकाद्वारा अन्तर्राष्ट्रिय गुणस्तर प्रमाण प्राप्त गरेको हो । 

मंगलवार नगरपालिकामा आईएसओ सर्टिफिकेसन नेपालका म्यानेजर सुदिप शर्माले नगरपालिकाका नगर प्रमुख बासुदेव घिमिरेलाई प्रमाणपत्र प्रदान गरे ।

कार्यक्रममा बोल्दै तिलोत्तमा नगरपालिकाका नगर प्रमुख बासुदेव घिमिरेले नगरपालिकाले विभिन्न मापदण्डमा रहेका सूचक पूरा गर्ने लक्ष्यसहित अघि बढेर समयमै कार्यसम्पन्न गरी देशमै पहिलोपटक अन्तर्राष्ट्रिय गुणस्तर प्रमाणपत्र प्राप्त गरेको बताए । 

सहयोग गर्ने सबैप्रति आभार व्यक्त गर्दै नगर प्रमुख घिमिरेले ३ वर्षसम्म म्याद रहने गुणस्तरलाई दीगोपन दिन सबै कर्मचारी, जनप्रतिनिधि तथा नगरबासीले समेत गरिमा बचाइराख्नुपर्ने बताए ।