ऊर्जा, जलस्रोत तथा सिँचाइमन्त्री पम्फा भुसालले मुलुकमा राजनीतिक परिवर्तन आइसकेको हुनाले अब आर्थिक र सामाजिक समृद्धिमा लाग्न आवश्यक रहेको बताएका छन् ।

नेकपा माओवादी केन्द्र महाभारत–उपत्यका सम्पर्क समन्वय समितिले काभ्रेपलाञ्चोकको बनेपामा बुधवार आयोजना गरेको वैचारिक–राजनीतिक प्रशिक्षणमा मन्त्री भुसालले आफ्नो ठाउँमा भएका साधन स्रोतको भरपुर प्रयोग गर्न अबको चुनावी एजेण्डा बन्नुपर्ने बताए ।

नेकपा माओवादी केन्द्रले गरेको जनयुद्धको जगमा भएको जनआन्दोलनको नयाँ ढंगको क्रान्तिबाट संविधान लिपिबद्ध गरिसकेको र सिंहदरबारको अधिकारलाई जनताको घर आँगनमा पुर्‍याएका कारण त्यहीँबाट सबैखाले अधिकार प्राप्त गरिसकेको अवस्थामा बाँकी अधिकार अब आउने निर्वाचनबाट थप उपलब्ध गराउने उनले बताए ।

‘संविधानको कार्यान्वयन हुँदा जनताले घर आँगनबाट नै धेरै अधिकार उपयोग गर्न पाएको छ,’ उनले भने, ‘तर एजेण्डा एउटाको, नेतृत्व अरुको भएको कारण अझै धेरै समस्या छन् ।’

ती समस्याको समाधान गर्नका लागि अब आउने निर्वाचनबाट चुनेका जनप्रतिनिधिले पूरा गर्ने भएकाले उनीहरूको विशेष भूमिका हुने मन्त्री भुसालले बताए ।

उनले समाजमा वर्ग रहेसम्म वर्ग संघर्ष भए पनि विगतको जस्तो जनयुद्ध नहुने बताए । उनले अबको निर्वाचनमा परिवर्तनको आकांक्षालाई सम्बोधन गर्ने व्यवस्थाको रक्षा गर्दै आर्थिक तथा सामाजिक जीवनमा रूपान्तरण ल्याउन जनताले अनुभूत गर्ने खालको विकास गर्ने कुरालाई मुख्य एजेण्डा बनाएर अगाडि बढ्न पार्टीका नेता कार्यकर्तालाई निर्देशन दिए ।