नेकपा एमाले उपाध्यक्ष तथा पूर्वअर्थमन्त्री विष्णु पौडेलले एमाले रोज्नेहरूले कहिल्यै पछुताउनुपर्ने अवस्था नआउने बताएका छन् । 

सोमवार भैरहवा आयोजित पार्टी प्रवेश कार्यक्रममा बोल्दै पौडेलले एमाले प्रवेशको लहर देशव्यापी चलेको भन्दै जनताले गरेको विश्वासमाथि कहिल्यै घात नगर्ने बताएका हुन् । 

‘एमालेमा प्रवेशको लहर चलेको छ, यो निरन्तर एमालेले आर्जन गरेको जनविश्वास हो,’ उनले भने, ‘यो जनविश्वासमाथि कहिल्यै घात गर्ने छैन ।’

पौडेलले अब कपिलवस्तुमा एमालेसँग अरू कुनै पार्टीहरूको तुलना हुन नसक्ने र उनीहरूले प्रतिस्पर्धा गर्न पनि नसक्ने पौडेलले दाबी गरे । 

भैरहवामा विभिन्न पार्टी परित्याग गरी ६०० भन्दा बढी एमालेमा प्रवेश गरेका छन् । लोकतान्त्रिक समाजवादी पार्टीका केन्द्रीय संस्थापक सदस्य हजरत अलि मुसलमान, जसपाका नेता तथा वडा नं ८ वडाध्यक्षका उम्मेदवार रहेका ओसिम खान, जसपाका नेता सलामद अलि, उद्योगीव्यवसायी सुरेन्द्र केसीलगायत एमालेमा प्रवेश गरेका छन् ।