स्थानीय तह निर्वाचनको तयारी र सत्तारूढ गठबन्धनसँग तालेमलबारे निर्णय लिन बोलाइएको नेपाली कांग्रेस केन्द्रीय कार्यसमितिको बैठकमा २ महामन्त्रीले चुनावी गठबन्धनबारे विभाजित भएका छन् । 

शुक्रवारबाट शुरू भएको बैठकमा महामन्त्रीद्वय गगनकुमार थापा र विश्वप्रकाश शर्माले आफ्नो धारणा राखेका छन् ।

कांग्रेसको १४औं महाधिवेशनपछि २ महामन्त्री राजनीतिक मुद्दाका हिसाबले पहिलोपटक विभाजित भएका हुन् ।
 
बैठकमा महामन्त्री गगन थापाले चुनावमा सत्तारूढ गठबन्धनसँग तालमेल गर्न नहुने तर्क राखेका छन् भने विश्वप्रकाश शर्माले गठबन्धन गर्नुपर्ने भनेका छन् ।

सभापति शेरबहादुर देउवा, नेताहरू रामचन्द्र पौडेल, कृष्णप्रसाद सिटौला लगायतले एमालेलाई हराउनको लागि माओवादी केन्द्र र एकीकृत समाजवादीसँग चुनावी तालमेल गर्नुपर्ने बताइरहँदा थापाले भने बैठकमा कांग्रेस एक्लै चुनावमा जानुपर्ने बताएका हुन् ।

देशभरका लाखौं नयाँ मतदातालाई अहिले रूख छाडेर अर्को चुनाव चिह्नमा मत हाल्न आग्रह गर्दा फेरि रूखमा भोट हाल्ने ग्यारेन्टी नभएकाले गठबन्धन गर्न नहुने तर्क थापाले बैठकमा पेश गरेका थिए ।

नयाँ मतदाताहरू कांग्रेसमा भोट हाल्न तयार रहेका थापाले बताए । उनले बैठकमा भनेका छन्, ‘अहिले हँसियाहथौडा र कलममा भोट हालेका मतदाताले अर्को चुनावमा रुखमा भोट हाल्ला त ?’

अर्कोतर्फ माओवादी केन्द्र र एकीकृत समाजवादीसँग चुनावी गठबन्धन गर्दा सैद्धान्तिकरूपमा परिभाषित गर्न पनि नसकिने उनले बताएका थिए ।

अर्का महामन्त्री शर्माले स्थानीय तहको आवश्यकताको आधारमा गठबन्धन गर्नुपर्ने धारणा बैठकमा राखेका छन् । 

कुनै ठाउँमा नेपाली कांग्रेस अघि रहेको र कतिपय ठाउँमा माओवादी केन्द्र अघि रहेकाले त्यसलाई विचार गरेर चुनावी गठबन्धन गर्नुपर्ने शर्माको भनाइ छ । 

बैठकमा शर्माले भनेका छन्, ‘मतभार हेरेर स्थानीय तहको अवस्था अनुसार तालमेल गर्नुपर्छ ।’

कांग्रेसमा चुनावी गठबन्धनबारे स्पष्ट २ धार देखिएका छन् । सभापति देउवा पक्षका नेताहरू गठबन्धन गरेर  जानुपर्ने पक्षमा छन् भने शेखर कोइराला पक्षका नेताहरू कांग्रेस एक्लै चुनावमा सहभागी हुनुपर्ने पक्षमा छन् । 

मंगलवार दिउँसो ३ बजेसम्मका लागि केन्द्रीय कार्यसमितिको बैठक स्थगित गरिएको छ । मंगलवार बस्ने बैठकले चुनावी तालमेल गर्ने वा नगर्नेबारे निर्णय गर्ने कांग्रेसका प्रवक्ता डा. प्रकाशशरण महतले बताए ।