सत्तारूढ गठबन्धनले चैत्र २२ गतेभित्र स्थानीय तहमा गठबन्धनको राजनीतिक शक्तिको रिपोर्टिङ लिने निर्णय गरेको छ ।

प्रधानमन्त्री निवास बालुवाटारमा बसेको ५ दलीय गठबन्धनको बैठकले प्रदेश, जिल्ला र स्थानीय तहमा राजनीतिक संयन्त्र बनाउने र ती संयन्त्रमार्फत स्थानीय तहको राजनीतिक शक्तिको रिपोर्टिङ लिएर तालमेलबारे छलफल गर्ने निर्णय भएको नेपाली कांग्रेसका नेता तथा सरकारका प्रवक्ता ज्ञानेन्द्रबहादुर कार्कीले बताए । 

‘प्रदेश, जिल्ला र पालिकामा बनेको संयन्त्रले चैत्र २२ गतेभित्र ५ दलको अवस्था कस्तो छ भन्ने प्रतिवेदन पेश गर्छ । त्यसलाई हेरेर दलहरूबीच तालमेलबारे छलफल गर्छौं,’ कार्कीले भने । 

राष्ट्रियसभा निर्वाचनमा जस्तै एकताबद्ध भएर स्थानीय निर्वाचनमा ५ दलीय गठबन्धन खडा हुने कार्कीले बताए । 

‘संयन्त्रले वस्तुगत तथ्यको आधारमा प्रतिवेदन दिन्छन् । निर्वाचनमा एकठाउँमा उभिएर चुनाव लड्छौं,’ उनले भने ।