स्थानीय चुनाव : शुरू भयो स्वतन्त्र उम्मेदवारी अभियान

स्थानीय तहमा दल बिहिन निर्वाचन हुनुपर्छ भन्दै ‘स्वतन्त्र उम्मेदवारी अभियान’ शुरू भएको छ । 

आज (बिहीवार) नयाँ बानेश्वरमा सडक पत्रकार सम्मेलन गर्दै डम्मर साहुको संयोजकत्वमा देशका ७५३ स्थानीय तहमा स्वतन्त्र उम्मेदवारको घोषणा भएको हो । 

अभियानमार्फत १ हजार ९९८ जनाले स्थानीय तहको निर्वाचनमा उम्मेदवारी घोषणा गरेका छन् ।

उम्मेदवारी घोषणा गर्नेमा प्रदेश १ मा २४७ जना, मधेश प्रदेशमा ३०९, बागमती प्रदेशमा ४ जना छन् ।

त्यसैगरी, गण्डकी प्रदेशमा २८६ जनाले उम्मेदवारी घोषणा गरेका छन् । लुम्बिनीमा २६५, कर्णालीमा १८८ र सुदूरपश्चिम प्रदेशमा २३९ जनाले उम्मेदवारी घोषणा गरेको अभियानका संयोजक साहुले पत्रकार सम्मेलनमा बताए । 

उनका अनुसार अभियानमार्फत देशभरबाट ४ हजार ६५७ जना उम्मेदवारी हुने इच्छासहितको फारम भरेको बताए ।

‘स्वतन्त्र उम्मेदवारी अभियानको मुख्य उद्देश्य स्थानीय तह दलीय राजनीति मुक्त हुनुपर्छ भन्ने हो । स्थानीय तहमा स्वतन्त्र उम्मेदवार दिन तयार भएका स्वच्छ छवि भएका नैतिक र इमान्दार जो कोही पनि यो अभियानमा जोडिन सक्छन्,’ साहुले भने,‘स्थानीय तह भ्रष्टाचारमुक्त हुनुपर्ने, जनताका दैनिक आवश्यकता पूरा गर्नुपर्ने, विकासका एजेन्डालाई प्राथमिकता दिनुपर्ने र जनता सेवामा समर्पित हुनुपर्ने यो अभियानको उद्देश्य हो ।’

अहिलेका नेताहरुले देशलाई दिशानिर्देश गर्न नसकेको, न्याय मारेका कारणले नयाँ शक्तिको आवश्यकता भएकाले यो अभियान आएको डाक्टर सुरेन्द्र भण्डारीले बताए । 

‘अहिलेका नेताहरुले देशलाई दिशा निर्देश गर्न सकेनन्, त्यसैले नयाँ अभियानको खाँचो भएर आएका हो,’ डा. भण्डारीले भने । 

उनले अहिलेका दलले देश विकास नभएको र त्यसलाई तेस्रो धारको शक्ति आवश्यक भएको बताएका छन् ।  

अभियानले देशभरिमा पत्रकार सम्मेलन मार्फत र सामाजिक सञ्जाल मार्फत उम्मेदवारी घोषणा गरेको पत्रकार सम्मेलनमा संयोजक डम्मर साहुले बताए ।