भौतिक पूर्वाधार तथा यातायातमन्त्री रेणुकुमारी यादवले स्थानीय तह निर्वाचनमा सत्तारुढ दलहरूबीच गठबन्धन गरेरै अघि बढ्नुपर्ने अवस्था रहेको बताएकी छन् । 

जनता समाजवादी पार्टी, नेपालको नेतृ समेत रहेकी मन्त्री यादवले सबै ठाउँमा सत्तारुढ दलहरूबीच गठबन्धन नभए पनि ठाउँ हेरेर त्यसको निक्र्योल हुने पनि स्पष्ट पारिन् । 

शुक्रवार जनकपुर विमानस्थलमा स्थानीय सञ्चारकर्मीहरूले राखेका जिज्ञासाको जवाफ दिने क्रममा उनले महन्थ ठाकुर नेतृत्वको लोकतान्त्रिक समाजवादी पार्टीसँग भने तत्काल चुनावी गठबन्धन हुने अवस्था नरहेको स्पष्ट पारिन् । 

‘लोसपाको पनि विचार मिल्यो भने हामी सोच्न सक्छौं तर विचारै हामीसँग मिल्दैन । त्यसैकारणले गठबन्धन पनि विचारबाट, मनबाट र नियतबाट मिल्नुपर्छ,’ उनले भनिन्, ‘नियतै नमिल्दाखेरी  हात जोडेर मात्रै भएन । तर, सम्भावना भने अन्त्य हुँदैन ।’