कर्णालीका मुख्यमन्त्री जीवनबहादुर शाहीले प्रदेशको विकासका लागि ६ वटा ‘ब’लाई ध्यान दिनुपर्ने बताएका छन् ।

‘समृद्ध कर्णाली विकासका ५ वर्ष’ विषयक बहस कार्यक्रममा उनले कर्णालीको समृद्धि र विकास भएको हेर्न चाहने हो भने राज्यका सबै निकायले ६ वटा ‘ब’लाई ध्यान दिनुपर्ने बताए ।

मुख्यमन्त्री शाहीले संघीय सरकारले गरीबी, भोक, रोग र पिछडिएको उपमा दिएको कर्णालीको मुहार फेर्नका लागि ६ वटा ब (बाटो, बिजुली, विचार, वन, बजार र व्यवस्थापन) लाई ध्यान दिन आवश्यक रहेको बताए ।

‘यहाँका सबै बस्तीमा यी ६ ‘ब’लाई अबलम्वन गर्न नसकेकै कारण कर्णालीको विकास हुन नसकेको हो,’ उनले भने, ‘यदि कर्णालीका सबै बस्तीमा ६ ‘ब’को अवधारण पुर्‍याउने हो भने प्राकृतिक स्रोतसाधनले भरिपूर्ण कर्णालीको मुहार फेर्न कसैको मुख ताक्नुपर्ने अवस्था आउँदैन ।’

मुख्यमन्त्री शाहीले कर्णालीमा हुने सबै खाले नराम्रा कामको दोष आफू लिने र प्रदेशमा बनेका बाटो, बिजुुली, सिँचाइ, सडक, भवन, सरसफाइ लगायतका नयाँ र राम्रा कार्य भए त्यसको जस जनतालाई दिने बताए ।

कर्णालीको समृद्धि र विकासका लागि सबैले सकारात्मक रूपमा अगाडि बढ्नुपर्ने उनले बताए ।