नेकपा एकीकृत समाजवादीका अध्यक्ष माधवकुमार नेपालले आगामी निर्वाचनमा गठबन्धनका साझा उम्मेदवारले जित्ने बताएका छन् ।

५ दलीय गठबन्धनको निरन्तर वार्ता र छलफल भइरहेको बताउँदै देशभर गठबन्धनका साझा उम्मेदवारले जित्ने दाबी गरे । 

कपिलवस्तुको चन्द्रौटामा पार्टीको सभा तथा पार्टी प्रवेश कार्यक्रमलाई मंगलवार सम्बोधन गर्दै अध्यक्ष नेपालले पार्टी समाजवादको दिशामा अगाडि बढेको बताउँदै न्याय, सत्य र परिवर्तनका लागि काम गर्न नेता–कार्यकर्तालाई आग्रह गरे ।

एकीकृत समाजवादीप्रति जनताको आकर्षण देखेर विपक्षी दलहरू बर्बराउन थालेको दाबी उनले गरेका छन् ।

सामाजिक सुरक्षा भत्ता ५ हजार रुपैयाँ पुर्‍याउने उनले बताए । आफू एमालेमा रहँदा वृद्धभत्ताको शुरूआत गरेको भन्दै अब भत्ता वृद्वि गर्ने पूर्व प्रधानमन्त्री नेपालले बताए ।

६ महिनाअघि गठन गरेको पार्टीमा अहिले जनताको लहर रहेको बताउँदै उनले मेयर र वडाध्यक्ष दैनिक रूपमा पार्टी प्रवेश गरिरहेका बताए । 

लुम्बिनीसँग जोडेर कपिलवस्तुलाई पर्यटकीय क्षेत्रको रूपमा विकास गर्नुपर्ने बताउँदै पर्यटक भित्र्याएमा नागरिकहरू आत्मनिर्भर बन्ने बताए ।