गृहमन्त्री बालकृष्ण खाँणले आदिवासी जनजातिले मुलुकमा सीमा सुरक्षाको काम गरेको बताएका छन् ।

म्याग्दी सदरमुकाम बेनीमा शुक्रवार नेपाल छन्त्याल संघको सातौं राष्ट्रिय महाधिवेशनको उद्घाटन गर्दै गृहमन्त्री खाँणले तराईदेखि हिमालसम्मको सिमानामा आदिवासी जनजातिले मुलुकको सीमा सुरक्षाका रूपमा भूमिका खेलेको बताए ।

‘हामीले तराईदेखि हिमालको फेदीसम्म हेर्‍यौं भने आदिवासी जनजातिको बसोबास रहेको देख्छौं, त्यहाँ उहाँहरू बसोबास मात्रै गर्नुभएको छैन, नेपालको भूमिको रक्षा गर्न पनि भूमिका खेल्नुभएको छ, उहाँहरूप्रति सरकार धन्यवाद ज्ञापन गर्न चाहन्छ,’ उनले भने । नेपालको दुर्गम र विशिष्ट भूभागमा उल्लेख्य बसोबास रहेको छन्त्याल समुदायको अधिकारको रक्षा र कला संस्कृतिको संरक्षणमा सरकार प्रतिबद्ध रहेको उनले बताए ।

छन्त्याल समुदायको पुख्र्यौली पेशा खानी उत्खनन् रहेको उल्लेख गर्दै उनले खानी उत्खनन गर्दा स्थानीयको मर्म र भावना बुझेर मात्रै अघि बढ्नु उचित हुने धारणा राखे । ‘खानीले तत्कालीन समयमा नेपालको आवश्यकता परिपूर्तिमा महत्त्वपूर्ण योगदान दिएको थियो, अब उत्खननको क्रममा पनि आदिवासी जनजातिहरुसँगको सहकार्यलाई जोड दिनुपर्छ, स्थानीयको भावना र चाहना समेटिनुपर्छ, स्थानीयवासीको उचित व्यवस्थापन गरेर मात्रै खानी उत्खनन हुन्छ,’ गृहमन्त्री खाँणले भने ।