अर्थमन्त्री जनार्दन शर्माले गभर्नर महाप्रसाद अधिकारीमाथि राष्ट्र बैंक ऐनअनुसार कारबाही गरिएको बताएका छन् । किन गरियो भन्नका लागि छानबिन समिति बनाइएको र त्यसको प्रतिवेदन आएपछि थाहा हुने उनले बताए । 

सोमवार अर्थ मन्त्रालयमा आयोजित पत्रकार सम्मेलनमा मन्त्री शर्माले गभर्नरमाथिको कारबाही राष्ट्र बैंक ऐनअनुसार गरेको भन्दै छोटो प्रतिक्रिया जनाएका हुन् । 

‘गभर्नरमाथिको कारबाही राष्ट्र बैंक ऐनअनुसार गरेको हो, किन गरियो भन्नका लागि छानबिन गर्न समिति बनाइएको छ । छानबिन समितिलाई काम गर्न दिएमा एक महिनामा सबै कुरा आउँछ,’ मन्त्री शर्माले भने । 

मन्त्री शर्माले देशको अर्थतन्त्रको अवस्था बाहिर चर्चा गरिएजस्तो नाजुक नभएको दाबी गरे ।