बुटवल उपमहानगरपालिकाको नगर प्रमुख (मेयर) पदमा नेकपा एमालेले ८ जनाको नाम सिफारिस गरेको छ ।

एमाले उपमहानगर कमिटीको बैठकले ३ जना केन्द्रीय सदस्यसहित ८ जनाको नाम जिल्लामा सिफारिस गरेको हो ।

नगर प्रमुखको उम्मेदवारका लागि अहिलेका मेयर शिवराज सुवेदी, उपमेयर गुमादेवी आचार्य, गोपाल राना, बाबुराम भट्टराई, सावित्रा अर्याल, तेजेन्द्र केसी, रामप्रसाद रेग्मी र सूर्यबहादुर भट्टराईको नाम सिफारिस गरिएको नगर अध्यक्ष किसन ज्ञवालीले लोकान्तरलाई जानकारी दिए । 

एमाले केन्द्रीय सदस्य तथा नगर प्रमुख सुवेदीले आफूले अगाडि सारेका योजनाहरू पूरा गर्न पुनः एक पटक दोहोरिन चाहेको बताउँदै आएका छन् । उपप्रमुख आचार्यले आफू अब स्वतः मेयरको दाबेदार रहेको बताउँदै आएकी छन् ।

राना रुपन्देहीका युवा नेता हुन् । उनी सबैसँग घुलमिल छन् । औषधि व्यवसायी संघका केन्द्रीय अध्यक्ष भट्टराई मिलनसार छन् । 

अर्यालले यसअघि उपमेयरमा दाबी गर्दै आएकी थिइन् तर अहिले नगरले उनको नाम मेयरमा सिफारिस गरेको छ । अर्याल एमाले केन्द्रीय सदस्य हुन् । केसी एमाले रुपन्देहीकी अध्यक्ष हुन् ।

उनले पनि पार्टीले अगाडि सारे उपमहानगरको नेतृत्व सहाल्ने बताउँदै आएकी छन् । रेग्मी बुटवल उपमहानगरपालिकाको प्रवक्ता तथा १५ नम्बर वडाको वडाध्यक्ष हुन् भने भट्टराई लुम्बिनी प्रादेशिक अस्पतालका पूर्व अध्यक्ष हुन् । उनी पनि एमालेका सबै नेतासँग नजिक छन् । 

उपमेयरमा पनि ८ जनाको नाम सिफारिस भएको ज्ञवालीले बताए । स्थानीय चुनावमा बुटवलको निर्वाचनलाई विशेष चासोका साथ हेरिएको छ । बुटवल एमाले उपाध्यक्ष तथा पूर्व अर्थमन्त्री विष्णु पौडेलको गृहनगर हो । १९ वडा रहेको बुटवलमा ९० हजारभन्दा बढी मतदाता छन् ।

गत निर्वाचनमा एमालेले मेयर/उपमेयरसहित १६ वडामा जीत हासिल गरेको थियो । ८ जनाको नाम सिफारिस भए पनि मुख्य प्रतिस्पर्धी राना, भट्टराई र सुवेदी रहेका जनाइएको छ ।