नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले तत्कालीन नेकपामा आफ्नो प्रभाव बढ्दै गएपछि पार्टी फुटाउने षड्यन्त्र भएको बताएका छन् ।

बिहीवार ललितपुरमा आयोजित नेकपा माओवादी केन्द्रको माओवादी ध्रुवीकरण तथा एकता कार्यक्रममा बोल्दै अध्यक्ष दाहालले यस्तो बताएका हुन् ।

उनले तत्कालीन नेकपामा रहेका पूर्व एमालेका ८० प्रतिशत नेताहरूले माओवादी जनआन्दोलनको ऐतिहासिकता स्वीकार्न थालेपछि पार्टीमा विद्रोह शुरू भएको बताए ।

अध्यक्ष प्रचण्डले तत्कालीन नेकपामा पूर्व एमालेका अधिकांश नेताहरूले अबको नेता प्रचण्ड भन्न थालेपछि पार्टी फुटाउने षड्यन्त्र भएको पनि बताए । उनले नेकपामा रहँदा माओवादीको पंक्ति ठूलो भइदिएको भए पार्टी कब्जा माओवादीले गर्ने पनि बताए । अध्यक्ष दाहालले अझै पनि नेकपा एमालेमा रहेका अधिकांश नेताहरु समाजवादी क्रान्तिका लागि तयार इमान्दार कम्युनिस्ट रहेको र उनीहरूको नेतृत्व पनि आफूले गर्नुपर्ने बताए ।

उनले नेकपा एमालेको नेतृत्वले पार्टीका नेताहरूलाई प्रतिक्रान्तिकारी र प्रतिगमनका बन्दी बन्न बाध्य बनाएको आरोप पनि लगाए ।

अध्यक्ष दाहालले भने, ‘हामीले नेकपा एमालेसँग एकता गरेका थियौं । के विश्वासमा गरेको थियो भने अब तत्काल भूमिगत जाने, जनयुद्ध गर्ने र विद्रोह गर्ने स्थिति छैन । त्यो अवस्थामा हिजो एउटा चरण त हामीभन्दा चर्को क्रान्तिकारी कुरा गर्ने, झापा विद्रोह । मालेकालका थुप्रो नेता, कार्यकर्ता त्यहाँ छन्, अहिले पनि समाजवादतिरै जाने हो भन्ने पनि छन् भने हामी किन ध्रुविकृत नहुने भनेर गरियो । त्यो पनि अरुले गरेर भएन, तपाईंहरूलाई प्रचण्डले के–के गर्छ–गर्छ भन्ने भएको थियो होला तर जसरी एकता केन्द्र बनाउँदा जोखिम उठाउन खोजिएको थियो । त्यो एकताबाट कम्युनिस्टहरूलाई सबैलाई एक ठाउँमा राखेर समाजवादतिर लानुपर्छ र सकिन्छ भन्ने विश्वासले हामीले नै अझ मेरो नै प्रस्तावमा काम अघि बढेको थियो । त्यो कतिबेला दुर्घटनामा पर्‍यो भने जतिबेला एमाले भित्रको ठूलो तप्काले माओवादी आन्दोलनको ऐतिहासिकता स्वीकार्न थाल्यो, माओवादी जनयुद्धकै कारण नेपालमा उत्पीडित, जाति, वर्ग, क्षेत्र, समुदायले जागरण ल्याएको हो र संघीय लोकतान्त्रिक गणतन्त्र माओवादीकै कारण आएको हो भन्ने कुरामा सहमत भएको देखियो र अध्यक्ष प्रचण्डको नेतृत्वमा केन्द्रीय समितिको दोस्रो बैठकमा सबै पूर्व एमालेको पनि अत्याधिक ठूलो संख्या, ८–१० जना छाडेरले अबको नेता अध्यक्ष प्रचण्ड हो भन्ने ठाउँमा पुग्यो त्यसपछि षड्यन्त्र शुरू भयो । भयानक षड्यन्त्र शुरू भयो । आजकाल तपाईंहरूले सुन्नुभएको होला, एमालेका केही नेताहरू भन्ने गर्छन्, अझै केही समय रोकेको भए त प्रचण्डले सम्पूर्ण पार्टी खाइसकेको थियो नि ! उनीहरू नै भन्छन् हामीले भन्नुपर्दैन । हामीले एकता गर्दा ६०/४० भनियो । यदि माओवादी नफुटेको भए त्यो हुँदैन थियो । हामी ६० हुन्थ्यौं, एमाले ४० हुन्थ्यो, माओवादी ६० भएको भए पार्टी फुट्दैन थियो । हामी साँच्चै समाजवादतिर त्यो पार्टीलाई लिएर जान्थ्यौं । त्यसैले एमालेका सबै खराब छन् भन्ने पनि सोच्नु हुँदैन । एमालेभित्र हामीले ३ वर्ष बसेर हेरेका छौं नि ! त्यहाँ पनि ८० प्रतिशतभन्दा बढी इमान्दार नै कम्युनिस्ट छन् । क्रान्ति भइदिए हुन्थ्यो भन्ने चाहना राख्नेछन् तर लिडरशीप भनेको चाबी जस्तो हो । नेतृत्वले यतिधेरै भ्रम दिएर राखेको छ कि तिनीहरूलाई बन्दी बनाएर राखेको जस्तो लाग्छ मलाई । एमाले भित्रका कम्युनिस्टहरू प्रतिक्रान्तिकारी र प्रतिगमनका बन्दी बन्न बाध्य छन् । हामीले तिनलाई मुक्त गर्नुछ । तिनलाई मुक्त गरेर तिनको पनि नेतृत्व हामीले गर्नुछ । त्यसैले ठूलो सोचाइ राखेर क्रान्ति गर्नुपर्छ ।’

अध्यक्ष दाहालले देशभित्र र बाहिर प्रतिगमनकारी तत्वले माओवादीको उपलब्धिलाई नष्ट गर्न खोजिरहेको पनि आरोप लगाए । उनले माओवादीका उपलब्धिलाई सुरक्षित गर्न सबै माओवादी एकत्रित भएर लड्नुपर्ने बेला आएको बताए । अध्यक्ष प्रचण्डले प्रतिक्रियावादीको रणनीति अहिले पनि माओवादीलाई घेरा हालेर सखाप पार्ने रहेको भन्दै त्यसलाई परास्त गर्न माओवादीले सबै माओवादीलाई एकजुट पार्ने, घेरा तोड्ने र प्रतिरोध गर्ने रणनीति बनाएर अघि बढ्ने बताए ।

अध्यक्ष दाहालले भने, ‘देशभर अब माओवादी ध्रुवीकरणलाई हामी सबैले सहयोग गर्नुपर्छ र प्रतिक्रियावादीहरूले देश भित्रका र देश बाहिरका सबैले माओवादीलाई क्षतविक्षत पार्ने, माओवादीका मुद्दालाई सिध्याउने, यसलाई कमजोर पार्ने र पूरै माओवादी आन्दोलनले ल्याएका उपलब्धि र परिवर्तनलाई नै उल्ट्याउने जो षड्यन्त्र भएको छ, त्यो षड्यन्त्रलाई परास्त गर्नु माओवादी आन्दोलनका सहभागी सबैका निम्ति त जीवनमरणको प्रश्न छँदैछ । राष्ट्रको निम्ति र आमजनता र समावेशी लोकतन्त्रको, समानुपातिक प्रतिनिधित्व प्रणालीको संघीयता, लोकतन्त्र, गणतन्त्रको धर्मनिरपेक्षता जस्ता कुराहरू माओवादी आन्दोलनले स्थापित गरेका मुद्दा हुन् । अरु कुनै पार्टी र विचारबाट यो भएको होइन । माओवादी कमजोर हुने बित्तिकै कसरी हामीले प्राप्त गरेका उपलब्धिमाथि हमला हुँदो रहेछ भन्ने कुरा गत सालदेखि नै हाल्यौं । अझै पनि त्यो खतरा टरेको छैन । अहिले पनि माओवादी आन्दोलन र माओवादी जनयुद्धले स्थापित गरेका एजेण्डाहरूलाई, मूल्य, मान्यतालाई प्रहार गर्ने, क्षतविक्षत पार्ने षड्यन्त्र रोकिएको छैन । प्रतिक्रियावादीहरूको रणनीति अहिले पनि माओवादीलाई घेरा हालेर सखाप पार्ने नै छ । हाम्रो रणनीति माओवादीलाई एकजुट पार्ने, घेरा तोड्ने र प्रतिरोध गर्ने नै छ । अब एकपटक फेरि क्रान्ति प्रक्रियालाई वैज्ञानिक समाजवादतिरको हाम्रो यात्रालाई माओवादीहरूकै सक्रियतामा अघि बढाउने बलियो आधार निर्माण हुँदैछ ।’