नेपाली सेनाको सैनिक माण्ड तथा स्टाफ तालिम शुरू भएको छ ।

शिवपुरीमा रहेको सैनिक कमाण्ड तथा स्टाफ कलेजमा सि.सं. २९ कमाण्ड तथा स्टाफ तालिम शुरू भएको सेनाले जनाएको छ । 

मध्यम तहका अधिकृतहरूको स्टाफ तथा नेतृत्व क्षमता विकास गर्न महत्त्वपूर्ण तालिममा नेपाली सेनाका तर्फबाट महिला अधिकृत ३ जनासहित ८० अधिकृतहरू लगायत नेपाल प्रहरी, सशस्त्र प्रहरी बल नेपाल र राष्ट्रिय अनुसन्धान विभागका तर्फबाट १/१ जना गरी ३ अधिकृतहरू र श्रीलंका, केन्या, नाइजेरिया, पाकिस्तान, बंगलादेश, बेलायत, भारत, माल्दिभ्स र संयुक्त राज्य अमेरिकाका १/१ जना गरी ९ विदेशी शिक्षार्थी अधिकृतसहित जम्मा ९२ जना अधिकृतहरू सहभागी रहेको नेपाली सेनाले जनाएको छ ।

विक्रम संवत् २०४९ पुस १४ गते स्थापना भएको कलेजले विक्रम संवत् २०५० भदौ २० गतेदेखि १२ जना शिक्षार्थी अधिकृतहरू समावेश गरी पहिलोपटक कमाण्ड तथा स्टाफ तालिम सञ्चालन गरेको थियो । हालसम्म नेपाली सेनाबाट १०४०, विभिन्न मित्रराष्ट्रहरूका ९९, नेपाल प्रहरीबाट १३, सशस्त्र प्रहरी बलबाट २५, राष्ट्रिय अनुसन्धान विभागबाट १६ र रक्षा मन्त्रालयबाट १ गरी जम्मा १,१९४ जना शिक्षार्थी अधिकृतहरू तालिमबाट दिक्षित भएका सेनाले जनाएको छ ।