निर्वाचन आयोगले आसन्न स्थानीय तह निर्वाचनका लागि ४६ जिल्लाका ९५ लाख २५ हजार मतपत्र छापिसकेको जनाएको छ ।

निर्वाचनका लागि आयोगले १ करोड ९४ लाख मतपत्र छाप्ने तयारी गरेको सहसचिव तथा प्रवक्ता शालिग्राम शर्मा पौडेलले जानकारी दिए ।

वैशाख १ गतेदेखि हालसम्म आयोगबाट भएका निर्णय, क्रियाकलाप र गतिविधिको जानकारी दिँदै आयोगले स्थानीय तह निर्वाचन सम्बन्धी सम्पूर्ण गतिविधि र सूचनाको सहजरूपमा जानकारी दिन हरेक दिन ‘स्थानीय तह निर्वाचन ई–बुलेटिन’ प्रकाशन गरिरहेको जनाएको छ । बुलेटिन आयोगको वेबसाइटमा उपलब्ध रहेको छ ।

आयोगले आगामी स्थानीय तह निर्वाचनमा मुख्य निर्वाचन अधिकृत र निर्वाचन अधिकृतको कार्यालयले प्रयोग गर्ने साइनबोर्ड, लेटरहेड र छापमा एकरुपता कायम गर्न आयोगले ७७ वटै मुख्य  निर्वाचन अधिकृत र ६७६ वटै निर्वाचन अधिकृतको कार्यालयलाई प्रयोग गर्ने साइनबोर्ड, लेटरहेड र छापको नमूना प्रदेश निर्वाचन कार्यालय र जिल्ला निर्वाचन कार्यालयमार्फत पठाउन पत्राचार गरेको जनाएको छ ।

स्थानीय तह निर्वाचन आचारसंहिता उल्लंघन भएको भन्ने समाचार र सूचनाका आधारमा आयोगले विभिन्न राजनीतिक दल र सम्बन्धित नेतासँग चित्तबुझ्दो जवाफ पेश गर्न पत्राचार गरेको छ । जवाफ आउने क्रम जारी रहेको आयोगले जनाएको छ ।

स्थानीय तह निर्वाचनमा खटिने मुख्य निर्वाचन अधिकृत तथा निर्वाचन अधिकृत र निर्वाचन कार्यालयका प्रमुखका लागि गत चैत ३० गते ‘निर्वाचन सञ्चालन तथा व्यवस्थापन प्रादेशिक प्रशिक्षण’ विराटनगर, धुलिखेल, पोखरा र नेपालगञ्जमा तथा वैशाख २ गते जनकपुर, हेटौंडा, बुटवल र धनगढीमा सम्पन्न भएको छ । प्रशिक्षणपछि निर्वाचन अधिकृतहरूलाई नियुक्तिपत्र दिइएको छ । 

निर्वाचनमा आयोग र सञ्चार जगतसँगको समन्वय र सहकार्य अभिवृद्धि गर्दै निर्वाचनलाई स्वच्छ, स्वतन्त्र, निष्पक्ष, विश्वसनीय तुल्याउन निर्वाचन आचारसंहिताको कार्यान्वयनमा योगदान पुर्‍याउने हेतुले वैशाख ३ गते मधेश प्रदेशको जनकपुर, बागमती प्रदेशको हेटौंडा, लुम्बिनी प्रदेशको बुटवल र सुदूरपश्चिम प्रदेशको धनगढीमा मिडिया अभिमुखीकरण कार्यक्रम सम्पन्न भएको जनाइएको छ । 
 
 मिडिया अभिमुखीकरणमा प्रमुख निर्वाचन आयुक्त, निर्वाचन आयुक्त तथा प्रेस काउन्सिल नेपाल र नेपाल पत्रकार महासंघका पदाधिकारी एवं प्रतिनिधि सहभागी थिए । कार्यक्रम महासंघ र काउन्सिलको सहकार्यमा सम्पन्न भएको थियो । 

आयोगले राष्ट्रिय सञ्चार माध्यमका निर्वाचनसम्बन्धी विषयमा समाचार लेख्ने समाचारदाता र फोटो पत्रकारका लागि वैशाख ६ गते काठमाडौंमा अन्तर्क्रिया गर्दैछ ।