आसन्न स्थानीय तह निर्वाचनका सन्दर्भमा सत्तारुढ गठबन्धनबीच काठमाडौंमा भइरहेको छलफललाई स्थानीय समितिले अस्वीकार गरिरहेका छन् ।

मकवानपुरको हेटौंडा उपमहानगरपालिकाको प्रमुख पद नेपाली कांग्रेसले पाउनुपर्ने अडान नगर कार्यसमितिले राखेको छ । हेटौंडाको प्रमुख पद नेकपा एकीकृत समाजवादीलाई दिने तयारी भइरहेको चर्चाबीच कांग्रेसको नगर कार्यसमितिले बुधवार पत्रकार सम्मेलन गर्दै विरोध जनाएको छ ।

नगर कार्यसमितिले बुधवार पत्रकार सम्मेलन गर्दै गठबन्धनमा प्रमुख पद कांग्रेसले नपाउने अवस्थामा मित्रवत् प्रतिस्पर्र्धा गर्ने निर्णय भएको जनाइएको छ ।

नगर सभापति उत्सव इटेनीद्वारा हस्ताक्षरित विज्ञप्तिमा उल्लेख छ, ‘गठबन्धनको निर्णयको पुनरावलोकन नभएमा मिति २०७९ वैशाख ६ गते बसेको यस नगर समितिका पदाधिकारी तथा नगरका सबै १९ वडाका सभापतिहरूको निर्णयअनुसार सत्ता साझेदार गठबन्धनका दलहरूसँग मित्रवत् प्रतिस्पर्धाको आधारमा नेपाली कांग्रेस एकल नेतृत्वमा चुनावी प्रतिस्पर्धामा सहभागी हुने स्पष्ट गर्दछौं ।’