नेकपा माओवादी केन्द्र लुम्बिनी प्रदेशसभा सांसद दीपेश थारूले सांसद पदबाट राजीनामा दिएर मेयरको उम्मेदवारी दिएका छन् ।

थारूले सांसदबाट राजीनामा दिएर बर्दियाको राजापुर नगरपालिकामा माओवादीबाट मेयर पदमा उम्मेदवारको मनोनयन दर्ता गरेका हुन् ।
  
थारूले वैशाख ९ गते सोमवार सभामुख पूर्णबहादुर घर्तीलाई सांसद पदबाट दिएको राजीनामा ११ गते स्वीकृत गरिएको सूचना प्रदेशसभा सचिवालयले प्रकाशित गरेको छ तर उनले राजीनामा दिएर मेयरमा लडेको धेरैले पत्तो नै पाएनन् ।

उनी बर्दियाको निर्वाचन क्षेत्र नम्बर २(२) बाट प्रदेशसभा सदस्यमा प्रत्यक्ष निर्वाचित सांसद हुन् । ‘निर्वाचन प्रयोजनका लागि भनेर थारूले राजीनामा दिनुभएको थियो,’ प्रदेशसभा सचिवालयका सचिव दुर्लभकुमार पुनले लोकान्तरसँग भने, ‘११ गते राजीनामा स्वीकृत भएको छ । उहाँ निर्वाचित स्थान रिक्त रहेको सूचना प्रकाशित भएको छ ।’

नेपालको संविधानको धारा १८०(क) बमोजिम थारूले जितेको निर्वाचन क्षेत्र रिक्त भएको जनाइएको छ ।

‘प्रदेश सभाको बैठक चालू नरहेको अवस्थामा प्रदेशसभा नियमावली २०७४ को नियम १८५ को उपनियम २ बमोजिम जानकारीका लागि आदेशानुसार यो सूचनापत्र प्रकाशन गरिएको छ,’ प्रदेश सभाद्वारा जारी सूचनामा भनिएको छ । ८१ सदस्यीय प्रदेशसभा थारूको राजीनामासँगै ८० सदस्यीय भएको छ ।