पोखरा महानगरपालिकाका मेयर पदका उम्मेदवार धनराज आचार्यले आफूहरू निर्वाचित भएमा ‘ड्युटीफुल’ महानगर बनाउने बताएका छन् । 

पोखरामा आयोजित एक कार्यक्रममा आचार्यले निर्वाचित जनप्रतिनिधिदेखि महानगरको कर्मचारी सम्मलाई जिम्मेवार र ड्यूटीफुल बनाउने बताएका हुन् ।

गठबन्धनका तर्फबाट साझा उम्मेदवारका रुपमा प्रस्तुत आचार्यले २०७४ सालमा निर्वाचित एमाले नेतृत्वले जनप्रतिनिधि र महानगरका कर्मचारीलाई ड्यूटीफुल बनाउन नसकेको आरोप लगाए ।

‘महानगरले अहिले १० देखि ५ सम्मको कार्यालय समय तोकेको छ । महानगरले तोकेको समयमा जनप्रतिनिधि र कर्मचारी त आउँछन् तर उनीहरू काम नगरी बिताउँछन् अर्थात् ड्यूटीफुल भएनन्,’ उनले भने । 

आफूले काम गर्न नसकेपछि वर्तमान महानगर नेतृत्वले कर्मचारीले काम गरेन भनेर बहानाबाजी गरिरहेको उनको आरोप छ । ‘अहिलेसम्म महानगरका कर्मचारीले फुलड्युटी गर्नुभयो । अहिलेको महानगरको वर्तमान निर्वाचित नेतृत्वले पनि फुलड्युटी गर्नुभयो तर उहाँहरू ड्युटीफुल बन्न सक्नुभएन ।’