निर्वाचन आयोगले सुदूरपश्चिम प्रदेशका मुख्यमन्त्री त्रिलोचन भट्टदेखि बागमती प्रदेशका सामाजिक विकास मन्त्री कुमारी मोक्तानसम्मलाई स्पष्टीकरण  सोधेको छ।

बिहीवारसम्म ३७ जना व्यक्ति तथा राजनीतिक दललाई निर्वाचन आचारसंहिता विपरीत गतिविधि गरेको भन्दै स्पष्टीकरण सोधिएको निर्वाचन आयोगका प्रवक्ता शालिग्राम शर्मा पौडेलले  पत्रकार सम्मेलनमा जानकारी दिए ।

उनका अनुसार, सुदूरपश्चिम प्रदेशका मुख्यमन्त्री भट्टलाई   २४ घण्टा भित्र जवाफ पेश गर्न आयोगले निर्देशन दिएको छ । 

कैलालीको कैलारी गाउँपालिका वडा नम्बर ७ स्थित अग्निपीडितको स्थलगत अवस्था बुझ्न जाँदा प्रति परिवार ५० हजार रुपैयाँको दरले राहत दिने घोषणा गरेपछि मुख्यमन्त्री भट्टलाई स्पष्टीकरण सोधिएको प्रवक्ता पौडेलले जानकारी दिए ।

त्यसैगरी निर्वाचन पर्यवेक्षण समितिका प्रदिप पोखरेललाई पनि स्पष्टीकरण सोधिएको छ। 

निर्वाचन आयोगका आयुक्त र म्यादी प्रहरीका विषयमा दिएको अभिव्यक्तिका विषयमा उनलाई स्पष्टीकरण सोधिएको प्रवक्ता पौडेलको भनाइ छ।

आयोगले रौतहटको दुर्गाभगवती गाउँपालिकाको वडा नम्बर ५ का वडाध्यक्ष पदका उम्मेदवार दुर्गानन्द चौधरीले मत प्रभावित गर्न एक महिला लाई २ हजार नगद दिएको तथा अर्को व्यक्तिलाई पाइप दिएको उजुरी परेपछि स्पष्टीकरण सोधेको छ।

यस्तै काठमाडौं महानगरमा नेकपा एमालेको तर्फबाट मेयर पदका उम्मेदवार केशव स्थापितले अर्को प्रतिस्पर्धी उम्मेदवार बालेन शाहको विषयमा दिएको अभिव्यक्तिलाई लिएर २४ घण्टा भित्र लिखित जवाफ पेश गर्न स्पष्टीकरण सोधिएको पौडेलले जानकारी दिए ।

त्यसैगरी सिन्धुपाल्चोकको मेलम्ची नगरपालिकाको वडा नम्बर १० को वडाध्यक्ष पदका उम्मेदवार अमृत खनालले मतदाताको पाउमा हजारको नोट दिएको विषयमा समेत स्पष्टीकरण सोधिएको पौडेलले बताए।

त्यसै गरी बागमती प्रदेशकी सामाजिक विकास मन्त्री कुमारी मोक्तान प्रचार प्रसारमा खटिएको हुनाले स्पष्टिकरण सोधिएको छ।

रुपन्देहीको तिलोत्तमा नगरपालिकाको नगरप्रमुख वासुदेव घिमिरे पनि एमालेको प्रचार प्रसारमा खटिएको भन्दै स्पष्टीकरण सोधिएको छ।