ज्यान मुद्दामा थुनामा रहेका नेपाली कांग्रेसका निलम्बित सांसद आफताब आलमलाई थुनामै राखेर मुद्दाको पुर्पक्ष गर्ने उच्च अदालत वीरगंजले दिएको आदेशलाई सर्वोच्च अदालतले पनि सदर गरेको छ ।

सर्वोच्च अदालतका न्यायाधीशद्वय सुष्मालता माथेमा र नहकुल सुवेदीको संयुक्त इजलासले यसअघि उच्च अदालतले गरेको आदेशलाई नै सदर गरेको हो । 

इँटाभट्टामा मानिसलाई जिउँदै जलाएर हत्या गरेको तथा विष्फोटक पदार्थ बम समेत प्रयोग गरी हत्या प्रयास गरेको आरोपमा नेपाली कांग्रेसका प्रतिनिधि सभा सदस्यसमेत रहेका आलममाथि मुद्दा चलाइएको छ । उनी हाल ललितपुरको नख्खुस्थित कारागारमा छन् । 

आफूलाई थुनामुक्त गरी साधारण तारेखमा मुद्दा लड्न पाउँ भन्दै आलमले सर्वोच्च अदालतमा निवेदन दिएको थिए । उक्त निवेदनअनुसार प्रत्येक साता शुक्रवार पेशीमा चढ्दै आए पनि सुनुवाइ भइरहेको थिएन । तर गत साता पेशीमा चढेपछि सुनुवाइ सम्पन्न भएर आज आदेश गरिएको हो । 

गत फागुन १९ गते प्रधानमन्त्री शेरबहादुर देउवा रौतहट पुगेर उनलाई छुटाउन आफूले पहल गर्ने सार्वजनिक अभिव्यक्ति दिएका थिए । आलमको मुद्दा अदालती प्रक्रियामा रहेकाले प्रक्रियाबाटै उनलाई छुटाउन आफू प्रयासरत रहेको देउवाले बताएका थिए ।