अन्य दलका उम्मेदवारलाई समर्थन गरेको अफवाह फैल्याइएको भन्दै बालेनले गरे खण्डन

काठमाडौं महानगरपालिकाका मेयर पदका स्वतन्त्र उम्मेदवार बालेन शाहले कुनै पार्टी प्रवेश गरेको वा कुनै पार्टीका उम्मेदवारलाई समर्थन गरेको भन्ने हल्ला निराधार रहेको बताएका छन् ।

मौन अवधिको समयमा एक विज्ञप्ति जारी गर्दै उम्मेदवार शाहले निराधार हल्लाहरू फैलाउने प्रयास भएको भन्दै त्यसको खण्डन गरेका छन् ।

उनले भनेका छन्,हामी स्वतन्त्र छौँ । र, मौन अवधि पूर्व हामी मतदाताहरूको 'घरदैलोमा प्रवेश' गर्ने र हाम्रा मतदाताहरूको नै समर्थन लिनेदिने बाहेक अरु कुनै किसिमका व्यवहारहरु गरेका छैनौँ ।

उनले निर्वाचनभन्दा अगाडिको मौन अवधिको अर्थ समेत स्पष्ट पार्दै मौन अवधिको यो उत्तम तरिका भएको बताएका छन् ।

'निर्वाचन भन्दा अगाडिको मौन अवधिको अर्थ हुन्छ, उम्मेदवारहरूले आफ्ना मतदाताहरूलाई भन्ने जति भनिसक्ने र मतदाताहरू स्वयमले शान्त भएर उत्तम उम्मेदवार छान्न समय लिने । यसले सहि उम्मेदवारलाई मतदान गर्न सक्नु हुनेछ । लोकतन्त्रको यो उत्तम तरिका हो,' उनले लेखेका छन्,'तर, यहि समयलाई कसैको अस्तित्व, विचार, सन्देश र वास्तविकतामाथि आक्रमण गर्नमा उपयोग गर्नु गैरकानूनी र अलोकतान्त्रिक त हुदै हो, त्यो भन्दा पनि धेरै मतदाताहरूमाथिको अन्याय हो । मतदाताहरूलाई भ्रममा राखेरै भए पनि जित्नै पर्ने सोचको उपज हो । यस्ता हल्ला र हल्ला फैलाउने तत्वहरू प्रति सरकार, निर्वाचन आयोग र स्वयम् मतदाताहरू सजग रहन हार्दिक अपिल गर्दछौँ ।'