स्थानीय तह निर्वाचनमा अन्तर्घात भएको भन्दै नेकपा एमाले पोखरामा विवाद चर्किएको छ । यही क्रममा एमाले पोखरा महानगरपालिकाको एउटा वडाका पदाधिकारीले सामूहिक राजीनामा दिएका छन् । पोखरा महानगरपालिका वडा नम्बर २४ कास्कीकोट पार्टी  वडा कमिटीबाट ६ जना सदस्यले सामूहिक राजीनामा दिएका हुन् ।

 पार्टी प्रति निष्ठावान र चुनाव प्रचारमा सक्रिय हुँदाहुँदै पनि  केही जिम्मेवार नेताहरुकै कारण अन्तर्घात भएको र सोका कारण वडामा एमाले जिताउन नसकिएको भन्दै उनीहरुले राजीनामा दिएका हुन् । राजीनामा दिनेमा वडा कमिटी उपाध्यक्ष उत्तम गिरी, सदस्य थमन गिरी, बल बहादुर थापा, पार्वती गिरी (निर्मला), पवित्रा गिरी र दिपक पुरी रहेका छन् । 

उसो त पोखरा महानगरपालिकामा समेत अन्तर्घात भएको भन्दै विवाद सुरु भइसकेको छ ।