युक्रेनका राष्ट्रपति भोलोदीमीर जेलेन्स्कीले देशको सेनाको संख्या युद्ध शुरू भएपछि लगभग ६ गुणाले बढेको दाबी गरेका छन् । 

‘हामीलाई साढे दुई लाखदेखि दुई लाख ६० हजारसम्म सैनिक आवश्यक थिए तर युद्ध शुरू हुँदा हामीसँग लगभग एक लाख २० हजार मात्र सैनिक युद्धको तयारी अवस्थामा थिए,’ जेलेन्स्कीले युक्रेन २४ लाई बताए । 

आफूले सन् २०२२ को आरम्भतिर सैनिकको संख्या एक लाखले बढाउन आदेश दिएको उनले स्मरण गरे । तर त्यति संख्या पनि रुसी सेनालाई रोक्न पर्याप्त नरहेको उनले स्वीकार गरे । 

‘अहिले हाम्रा सैनिकको संख्या सात लाख छ । ती सबै सैनिक युद्धमा लडिरहेका छन्,’ उनले थपे । 

युद्ध शुरू भएलगत्तै जेलेन्स्कीले १८ देखि ६० वर्ष उमेरका सबै पुरुषलाई देशमै रहन र युद्ध गर्न भनेका थिए । 

गत साता युक्रेनी संसदमा पेश गरिएको एक विधेयकमा देशबाट पलायन भएका पुरुषलाई देश नफर्किएमा नागरिकताबाट वञ्चित गरिने प्रावधान राखिएको छ ।