सरकारले समायोजन गरी तोकेको भाडादर नपाएको भन्दै लुम्बिनी प्रदेशका ट्रक व्यवसायीहरू आन्दोलित भएका छन् । उनीहरूले सरकारले तोकेको भाडादर व्यवहारमा लागू हुनुपर्ने माग गर्दै जेठ २० गतेदेखि ट्रक ग्यारेजमा थन्काइ ढुवानी कार्य रोक्ने बताएका छन् ।  

भारतीय ओभरलोडका गाडीहरूका कारण नेपाली यातायात व्यवसायी मारमा परेका छन् भने अर्कोतर्फ उचित भाडादर नपाउँदा पेशा नै संकटमा परेको व्यवसायीहरूले गुनासो गरेका छन् । 

पश्चिमाञ्चल यातायात व्यवसायी समिति बुटवलको अगुवाइमा लुम्बिनी प्रदेशका ट्रक समितिले भाडादर कार्यान्वयनका लागि आन्दोलन थालेका हुन् । 

पश्चिमाञ्चल यातायात व्यवसायी समितिका अध्यक्ष यमप्रसाद पाण्डेले ट्रक व्यवसायीहरूको पेशा संकटमा पुगेकोले बाध्य भएर व्यवसायीलाई बचाउन आन्दोलनमा जान परेको बताए । 

राप्ती ट्रक व्यवसायी समितिका प्रशासनिक सचिव उमेश मजगैयाले भाडादर कार्यान्वयन नहुँदा ट्रक व्यवसाय धराशायी हुने अवस्थामा पुगेको बताए । वाणगंगा ट्रक समितिका सचिव लक्ष्मण भुसालले सरकारले तोकेको भन्दा कम दररेटमा ढुवानी गर्ने ट्रान्सपोर्ट व्यवसायीलाई बहिस्कार गर्नुपर्ने धारणा राखे ।