१ नम्बर प्रदेशमा भएको स्थानीय चुनावबाट १३७ पालिकामध्ये ६ पालिकाले महिला नेतृत्व पाएको छ ।

२०७४ सालको निर्वाचनमा १ पालिकाले मात्रै महिला नेतृत्व पाएको थियो । झापाको कमल गाउँपालिकामा अध्यक्ष मेनुका काफ्ले मात्रै पालिकाको नेतृत्वमा पुगेकी थिइन् ।

गत चुनावमा नेपाली कांग्रेसका हुकुमसिंह राईसँग मेनुकाको प्रतिस्पर्धा भएको थियो । प्रतिस्पर्धा निकै कडा थियो । दुवैले बराबर मत ल्याएपछि गोलाप्रथाबाट गाउँपालिका अध्यक्ष छानिएको थियो । हुकुम सिंह र मेनुकाले ८ हजार २७५ मत ल्याएका थिए । 

यस पटकको निर्वाचनमा ६ जना महिला पालिकाको नेतृत्वमा निर्वाचित भएका छन् । प्रदेशका २ नगरपालिका र ४ गाउँपालिकाले महिला नेतृत्व पाएको छ ।

झापाको बिर्तामोड नगरपालिका र गौरीगञ्ज गाउँपालिका, मोरङको कानेपोखरी गाउँपालिका, सोलुखुम्बुको लिखुपिके गाउँपालिका, खोटाङको हलेसी तुवाचुङ नगरपालिका र जन्तेढुंगा गाउँपालिकामा महिला नेतृत्व निर्वाचित भएका छन् ।

झापाको बिर्तामोड नगरपालिकाको मेयरमा नेकपा एमालेकी पवित्रा महतारा निर्वाचित भइन् । उनी यसअघि उपमेयर थिइन् । कांग्रेसका भोजराज सिटौलालाई ३ हजार ७५८ मतान्तरले पराजित गर्दै उनी मेयर बन्न सफल भइन् । 

प्रसाईंले १६ हजार ५२० मत प्राप्त गरिन् भने निकटतम प्रतिद्वन्द्वी सिटौलाले १२ हजार ७६२ मत मात्र पाए । ५० वर्षीय महतारा नेपाली कांग्रेस र माओवादी केन्द्रको गठबन्धनलाई पराजित गर्दै मेयर निर्वाचित भएकी हुन् । बिर्तामोडमा अघिल्लो निर्वाचनमा मेयर र उपमेयर दुवै एमालेले जितेको थियो ।

टिकट पाउनकै लागि उनले ठूलो सर्घष गर्नुपर्‍यो । महिलालाई टिकट दिँदा चुनाव जितिँदैन भनेर पार्टीका केन्द्रीय नेताहरू नै लागेका उनी बताउँछिन् । ५ वर्ष उपमेयर भएर चलाएको अनुभवले पनि बिर्तामोडलाई नमूना बनाउने उनी बताउँछिन् ।

झापाको गौरीगञ्ज गाउँपालिकामा नेपाली कांग्रेसकी ४५ वर्षीया फूलवती राजवंशी अध्यक्षमा विजयी भएकी छन् । नेकपा एमालेका उम्मेदवार विजय अग्रवाललाई पराजित गर्दै उनी अध्यक्षमा निर्वाचित भएकी हुन् ।

राजवंशीले ५ हजार ६८९ मत प्राप्त गरेकी छन् भने अग्रवालले ३ हजार ३३० मत पाएका छन् । उनी यसअघि गाउँपालिकाको उपाध्यक्षमा निर्वाचित भएकी थिइन् । गाउँपालिका अध्यक्षमा राप्रपाका बाबुराजा श्रेष्ठ विजयी हुँदा कांग्रेसबाट उपाध्क्ष निर्वाचित भएकी उनले यसपटक अध्यक्ष श्रेष्ठलाई तेस्रो स्थानमा धकेलेर अध्यक्ष निर्वाचित भएकी छन् ।

मोरङको कानेपोखरी गाउँपालिकामा नेकपा एमालेकी राजमति इङ्नाम नेपाली कांग्रेसका सञ्जय भट्टराईलाई पराजित गर्दै अध्यक्ष निर्वाचित भएकी छन् । उनले ८ हजार ९७५ मत ल्याएकी छन् भने भट्टराईले ५ हजार ८४६ मत पाएका छन् ।

गाउँपालिकाकी निवर्तमान उपाध्यक्ष रहेकी ५२ वर्षीया इङ्नाम भारी मतान्तरले अध्यक्षमा निर्वाचित भएकी छन् । कानेपोखरीमा अध्यक्ष र उपाध्यक्ष दुवै एमालेले जितेको छ । निवर्तमान उपप्रमुख समेत रहेकी इङ्नाम ‘महिलाले नेतृत्व गरेको पालिका नमूना रहेछ हेर्न जाऔ’ भन्ने बनाउने लक्ष्य रहेको बताउँछिन् । 

सोलुखुम्बुको लिखुपिके गाउँपालिका अध्यक्षमा कांग्रेसकी मीनादेवी कार्की विजयी भएकी छन् । १ हजार २६० मतसहित नेकपा माओवादी केन्द्रका डम्बरबहादुर बस्नेतलाई १४७ मतान्तरले पराजित गर्दै उनी विजयी भएकी हुन् ।

बस्नेतले १ हजार ११३ मत ल्याएका छन् । ५४ वर्षीया कार्कीले गाउँपालिकाका निवर्तमान अध्यक्ष बस्नेतलाई पराजित गरेकी हुन् ।

खोटाङको हलेसी तुवाचुङ नगरपालिकाको मेयरमा ४० वर्षीया विमला राई निर्वाचित भएकी छन् । नेपाली कांग्रेसकी उम्मेदवार राईले एमालेका खडेन्द्र राईलाई पराजित गरेकी हुन् ।

विमलाले ६ हजार ३१७ मत प्राप्त गर्दा एमाले उम्मेदवार खडेन्द्रले ५ हजार ९३४ मत पाएका छन् । विमला पनि निवर्तमान उपमेयर हुन् । यसअघिको निर्वाचनमा गाउँपालिको मेयर र उपमेयर दुवै कांग्रेसले जितेको थियो ।

खोटाङकै जन्तेढुंगा गाउँपालिकाको प्रमुखमा माओवादी केन्द्रकी अरुणादेवी राई निर्वाचित भएकी छन् । उनले गाउँपालिकाका निवर्तमान अध्यक्ष एमालेका शंकरबहादुर राईलाई पराजित गरेकी छन् ।

अरुणाले २ हजार ८८१ मत प्राप्त गरी विजयी हुँदा एमालेका उम्मेदवार शंकरबहादुर राईले २ हजार ५७५ मत प्राप्त गरेका छन् । अघिल्लो निर्वाचनमा अरुण अध्यक्षमा शंकरबहादुरसँगै पराजित भएकी थिइन् ।