बाँके, बर्दिया, अछामलगायतका जिल्लामा भएका घटना सम्बन्धमा गृहमन्त्री बालकृष्ण खाणले संसदमा दिएको जवाफप्रति असन्तुष्टि जनाउँदै एमाले सांसदहरूले संसदमा आक्रोश पोखेरका छन् । 

सभामुख अग्नि सापकोटाको रुलिङपछि गृहमन्त्री खाणले प्रतिनिधि सभाको मंगलवारको बैठकमा जवाफ दिएका थिए । बर्दियाको मधुवन नगरपालिकामा भएको घटनामा गृह प्रशासन, सीडीओको आदेश नभए पनि गोली चलेको भनेर गृहमन्त्री खाणले जवाफ दिएका थिए । 

सीडीओको आदेश नभई गोली कसरी चल्यो भनेर एमाले सांसदहरूले गृहमन्त्रीलाई पूरक प्रश्न सोधेका छन् । 

‘गृहमन्त्रीले आदेश दिएको होइन भन्नुभयो, सीडीओ, एसपीले आदेश नदिई गोली चलाउने प्रहरी छाडा हो ?,’ सांसद विमला विकले प्रश्न गरिन् ।

एमालेका घनश्याम खतिवडाले कसैको आदेशविना यसरी गोली चलेर भएका गैरन्यायिक हत्या सम्बन्धमा संसदीय छानबिन समिति बनाएर छानबिन गर्नुपर्ने माग गरे । 

शेरबहादुर तामाङले आदेश नदिए पनि बर्दिया घटनामा सरकारले नैतिक जिम्मेवारी लिनुपर्ने बताए । ‘गोली सरकारले बोकाएको हुन्छ, आदेश नदिए पनि जिम्मा सरकारले लिनुपर्छ,’ पूर्व कानूनमन्त्री समेत रहेका तामाङले भने, ‘वन्यजन्तु संरक्षणको नाममा नागरिकलाई गोली ठोक्न पाइन्छ ?’

गंगा चौधरी सत्गौवाले थारु गाउँमा लाठीभन्दा गोली किन चल्छ भनेर प्रश्न गरिन् ।

खगराज अधिकारीले गोली चलाउने आदेश नहुँदा नहुँदै गोली चलाउने मान्छेलाई 'सस्पेन्स' गरियो, गरिएन भनेर जवाफ माग गरे । 

पूरक प्रश्नमा जवाफ दिँदै गृहमन्त्री खाणले घटनाको छानबिनका लागि छानबिन समिति गठन गरिएको र दोषीमाथि कारबाही हुने प्रतिबद्धता जनाए ।

बर्दियाको मधुवन नगरपालिकामा सोमवार खेतमा काम गरिरहेको अवस्थामा ४१ वर्षीय अस्मिता थारुलाई चितुवाले आक्रमण गरेपछि स्थानीयले राजमार्गमा गरेको विरोधका क्रममा एक जनाको मृत्यु भएको थियो ।