नेकपा एमालेले काठमाडौं उपत्यकाको फोहोर उठ्न नसकेको बारे सरकारको जवाफ माग गरेको छ ।

बुधवार बसेको प्रतिनिधि सभा बैठकको शुरूमै सभामुखसँग समय लिएर नेकपा एमालेका सांसद कृष्णगोपाल श्रेष्ठले फोहोर नउठेको विषयमा सरकारसँग जवाफ माग गरेका हुन् । 

‘काठमाडौं दुर्गन्ध र फोहोरले आक्रान्त छ, उम्मेदवार नोमिनेसनको दिन वैशाख १२ गतेदेखि फोहोर नउठेकोमा परिणाम आएको दिनसम्म फोहोर उठेको छैन,’ काठमाडौंका सांसद श्रेष्ठले भने, ‘कुटनीतिक रुपमा पनि नेपालको वेइज्यत भयो । कुटनीतिक नियोगका सदस्यले आवस्यक नपरी नहिड्न भनेको कुरा थाहा पाएको छु ।’

सांसद श्रेष्ठले फोहोर नउठे काठमाडौंबासी चुप लागेर नबस्ने बताए ।

‘फोहोर किन नउठेको हो ? यस विषयमा सरकारले के हेरिरहेको छ ? तत्काल फोहोर उठ्छ कि उठ्दैन । यस रोष्ट्रमबाट तालुकदार मन्त्रालयको जवाफ चाहिन्छ । फोहोर नउठे काठमाडौंको जनता चुप लागेर बस्ने छैनन्,’ श्रेष्ठले भने ।

यसअघि कांग्रेस महामन्त्री गगन थापाले फोहोर नउठेको विषयमा सरकारको जवाफ माग गरेका थिए ।