भारतबाट काठमाडौं आएको दुई विमान भारी वर्षातको कारण भारतकै लखनउ विमानस्थल डाइभर्ट भएको छ । 

त्रिभुवन अन्तर्राष्ट्रिय विमानस्थलका अनुसार भारतबाट आएको इण्डिगो र विस्तार एयरलाइन्स डाइभर्ट भएर लखनउ गएका छन् ।  

काठमाडौं विमानस्थलमा भारी वर्षा भएका कारण दुई वायुसेवा डाइभर्ट भएर लखनउ गएको र मौसम अनुकुल भएपछि काठमाडौं नै आउने त्रिभुवन विमानस्थल कार्यालयले जानकारी दिएको छ । 

अहिले काठमाडौं विमानस्थलमा अवतरण गर्न नपाएका कारण फ्लाई दुबई भने आकाशमै फन्को मारेर होल्डमै बसिरहेको छ । 

त्रिभुवन विमानस्थल कार्यालयको विकल्प भैरहवास्थित गौतमबुद्ध अन्तर्राष्ट्रिय विमानस्थल भएको र यो विमानस्थल प्राविधिक रूपमा तयार भएपनि डाइभर्ट हुँदा भने भारत नै फर्किएका छन् ।

त्रिभुवन अन्तर्राष्ट्रिय विमानस्थलका प्रवक्ता टेकनाथ सिटौलाका अनुसार भैरहवा विमानस्थल तयारी अवस्थामा रहेको र जुनसुकै अन्तर्राष्ट्रिय वायुसेवाले अवतरण गर्न सक्ने छन् ।

‘काठमाडौं अवतरण गर्न नसकेको र डाइभर्ट भएका विमान भैरहवा जान आफैं तयार नभएका कारण भारत नै फर्किएका हुन्,’ सिटौलाले भने,‘भैरहवा विमानस्थलमा डाइभर्ट गरेर गएका जहाजका यात्रुलाई खाना खुवाउने, चालक दलले खाने बस्ने तयार यात्रुलाई राख्ने व्यवस्था सहजै हुनुपर्छ ।’

त्यो व्यवस्था नभएका कारण भैरहवा नगएको हुनसक्ने बुझाई सिटौलाको छ ।

उनका अनुसार अन्तर्राष्ट्रिय उडानका वायुसेवाले गन्तव्यमा पुग्न नसके डाइभर्ट भएर जाने  विमानस्थलको लागि पेश गरेको फ्लाइट प्लानमा जहाँ पेश गरेको छ त्यही जानुपर्ने हुन्छ । 

नेपाल आएका भारतीय तथा अन्य वायुसेवाले आफूलाई अनुकुल विमानस्थलमा अवतरण गर्ने र जहाज कुन विमानस्थलमा अवतरण गर्ने भन्ने निर्णय लिने अधिकार सम्बन्धित जहाज उडाउने क्याप्टेनकै भएको पनि सिटौलाले जानकारी दिए ।