जिल्ला समन्वय समिति (जिसस) पश्चिम नवलपरासीको प्रमुखमा एमाले र उपप्रमुखमा माओवादी केन्द्रका उम्मेदवार विजयी भएका छन् । 

मंगलवार भएको निर्वाचनमा प्रमुखमा एमालेका रुद्धल यादव र उपप्रमुखमा माओवादी केन्द्रका रामदयाल चौधरी विजयी भएका हुन् ।

७ पालिकाका १४ जना मतदाता रहेको निर्वाचनमा कसैको पनि बहुमत नपुगेपछि नेपाली कांग्रेस र माओवादी केन्द्रले गठबन्धन गरेका थिए । एमालेले राप्रपासँग गठबन्धन गरेको थियो । 

गठबन्धनका आधारमा कांग्रेस–माओवादी केन्द्रको बहुमत संख्या ८ पुगे पनि एमालेका उम्मेदवारले प्रमुख पदमा जितेका हुन् । एक मत बदर भएको छ ।

प्रमुख पदका विजयी उमेदवार यादवले ७ मत ल्याए भने नेपाली कांग्रेसका बालिन्द विक्रम शाहीले ६ मत ल्याएका थिए । उपप्रमुखमा माओवादी केन्द्रका चौधरीले ७ मत ल्याएर विजयी हुँदा एमालेकी कुन्तीकुमारी चौधरीले ६ मत ल्याइन् । 

दलित वा अल्पसंख्यकमा राप्रपाकी लवाङदीदेवी हरिजन विजयी भएकी छन् । महिला सदस्यमा राप्रपाकी शोभा चौधरी, नेपाली कांग्रेसकी शारदा परियार र कांग्रेसकै इन्दिरा कार्की विजयी भएकी छन् । कांग्रेसको चुनाव चिह्नबाट उम्मेदवार बनेकी कार्की भने माओवादी केन्द्रकी हुन् ।

९ सदस्यीय जिससको अन्य सदस्य पदमा नेपाली कांग्रेसको चुनाव चिह्नबाट उम्मेदवार बनेका धनिराम चौधरी विजयी भएका छन् । चौधरी माओवादी केन्द्रका हुन् । 

त्यस्तै राप्रपाका मकबुल मिया र नेपाली कांग्रेसका यमबहादुर दर्लामी मगर अन्य सदस्यमा विजयी भएका छन् ।