अर्थमन्त्री जनार्दन शर्माले बजेट तर्जुमा गर्ने क्रममा असम्बन्धित व्यक्ति सहभागी भएको भन्ने कुरा गलत रहेको बताएका छन् । अनधिकृत व्यक्तिले बजेट बनाएको कुरा भ्रामक रहेको मन्त्री शर्माले स्पष्ट गरे । 

मंगलवार बसेको प्रतिनिधि सभा बैठकमा सभामुखसँग समय लिएर अर्थमन्त्री शर्माले तोकिएको जिम्मेवारीभित्र रहेर बजेट बनेको बताएका हुन् । 

अर्थ र राजश्व सचिव तथा मातहतमा रहेका विभागीय प्रमुख र कर्मचारीको तहमा छलफल भएर बजेट बनेको उनले बताए । ‘बजेट निर्माण गर्दा राजश्वको दर परिवर्तन गर्न अन्य व्यक्ति सहभागी भएको भन्ने कुरा अत्यन्त भ्रामक, कपोकल्पित झुटा कथा बनाइएको छ,’ मन्त्री शर्माले भने ।