गण्डकी प्रदेशमा ९९ दशमलव ५ प्रतिशत घरधुरीमा बिजुली बत्ती पुगेको छ ।

प्रदेशमा अब २ हजार ८८४ घरधुरीमा मात्र विद्युत् पुर्‍याउन बाँकी रहेको बताइएको छ । 

गण्डकी प्रदेशको अर्थ मन्त्रालयले पहिलोपटक सार्वजनिक गरेको आर्थिक सर्वेक्षण विसं २०७८/०७९ का अनुसार अब प्रदेशमा ० दशमलव ५ प्रतिशत घरमा मात्र विद्युत्को पहुँच पुर्‍याउन बाँकी छ ।

प्रदेशका ५ लाख ७७ हजार ६८२ घरधुरीमध्येमा राष्ट्रिय प्रसारण लाइन तथा नवीकरणीय ऊर्जामार्फत ५ लाख ७४ हजार ७९८ घरपरिवारमा विद्युत्को पहुँच पुगेको उल्लेख छ । विक्रम संवत् २०७४ सालमा प्रदेश सरकार गठन हुँदा राष्ट्रिय प्रसारण लाइनमार्फत विद्युत्मा पहुँच प्राप्त परिवार ८२ दशमलव २ प्रतिशत रहेकामा हाल वृद्धि भई ९५ दशमलव ६८ प्रतिशत पुगेको जनाइएको छ ।

अझै पनि नवलपरासीको बुलिङटार गाउँपालिका र बौदीकाली गाउँपालिकाका केही वडा, बागलुङको तमानखोला र निसीखोला गाउँपालिकाका केही वडा, मुस्ताङको साङ्ता गाउँ, देवघाट गाउँपालिकाका अधिकांश ठाउँ, गोरखाको आरुघाट, धार्चे, चुमनुब्री गाउँपालिकाका अधिकांश स्थान र मनाङका नार्पाभूमि, चामे, नासों र मनाङ निस्याङ गाउँपालिकामा विद्युत् पहुँच पुग्न सकेको छैन । 

गण्डकीमा विभिन्न १३ वटा वितरण केन्द्रमार्फत ११ जिल्लामा विद्युत् वितरण भइरहेको उल्लेख छ । गण्डकी प्रदेशमा आधारभूत खानेपानीमा पहुँच पुगेको जनसंख्या ९३ दशमलव ७५ प्रतिशत रहेको छ । प्रदेश सरकारले घोषणा गरेको एक घर एक धारा कार्यक्रम अन्तर्गत हालसम्म ४२२ खानेपानी योजना सम्पन्न भएर ९३ हजार ८१८ घरधुरीमा निजी धारा जडान भई ४ लाख ७१ हजार ६८२ जनसंख्या लाभान्वित भएको तथ्यांकमा उल्लेख छ ।

प्रदेशमा कूल ३ लाख ७० हजार हेक्टर खेतीयोग्य जमिन रहेकामा २ लाख ७२ हजार हेक्टर मात्र सिँचाइयोग्य रहेको छ । सिँचाइयोग्य जमिन मध्येमा हालसम्म १ लाख ३७ हजार ८५० हेक्टर जमिनमा सिँचाइ सुविधा पुगेको जनाइएको छ ।

प्रदेशमा हाल १४ दशमलव ९१ प्रतिशत जनसंख्या निरपेक्ष गरीबीको रेखामुनि, २६ दशमलव १ प्रतिशत मानवीय गरीबीको रेखामुनि र १४ दशमलव १ प्रतिशत जनता बहुआयामिक गरीबीमा रहेका सर्वेक्षणमा उल्लेख छ ।