दाङको तुलसीपुरमा महिला र बालिका कुटेर प्रहरीले नियन्त्रणमा लिएकी लुम्बिनी प्रदेशकी स्वास्थ्य राज्यमन्त्री विमला वलीलाई बुटवल ल्याइएको छ ।

मुख्यमन्त्री कूल प्रसाद केसीको दबाबपछि दाङ प्रहरीले वलीलाई बुटवल पठाएको हो । 

वलीले मंगलवार बिहान तुलसीपुर उपमहानगरपालिका वडा नम्बर ५ स्थित वाइसिएल कार्यकता एकराज बस्तेतको घरमा प्रवेश गरी उनकी पत्नी मीना भण्डारी र छोरीलाई कुटपिट गरी तोडफोडमा उत्रिएकी थिइन् । 

दाङका प्रहरी प्रमुख सुरेश काफ्लेले बजेट अधिवेशन चलेकोले मुख्यमन्त्रीको आग्रहमा मन्त्री वलीलाई बुटवल पठाइएको जानकारी दिए । प्रदेश सरकारले बुधबार आर्थिक वर्ष २०७९/८० को बजेट सदनमा प्रस्तुत गर्दैछ । 

वलीविरुद्ध मीनाले इलाका प्रहरी कार्यालय, तुलसीपुरमा अभद्र व्यवसाहारको जाहेरी समेत दिएकी छिन् । प्रहरीले जाहेरी विरुद्ध अनुसन्धान गरिरहेको छ । वलीले बस्नेत आफ्नो प्रेमी रहेको मंगलबार कुटपिटमा उत्रिदा बताएकी थिइन ।

उनी लुम्बिनी सरकार ढाल्न तानातान परेपछि पटक पटक विवादमा आएकी सांसद हुन् । वलीलाई मुख्यमन्त्री निवासमा राखिएको बताइएको छ ।

वलीलाई तत्काल मन्त्रीबाट बर्खास्त गर्न प्रमुख प्रतिपक्ष दल नेकपा एमालेले माग गरेको छ ।