नाबालिग बलात्कारजस्तो गम्भीर प्रकृतिको मुद्दा कमजोर बनाउन दबाब दिइएको भन्ने विषयमा समाचार प्रकाशित भएपछि महान्यायाधिवक्ताको कार्यालयले ३ सदस्यीय छानबिन समिति बनाएको छ । 

उच्च सरकारी वकील कार्यालय पाटनका सहन्यायाधिवक्ताको संयोजकत्वमा गठित छानबिन समितिले १५ दिनभित्र प्रतिवेदन पेश गर्नेछ । 

सो समितिले पेश गरेको प्रतिवेदनका आधारमा दोषी देखिएका व्यक्तिहरूलाई कारबाही गरिने महान्यायाधिवक्ताको कार्यालयले जनाएको छ । 

यो पनि पढ्नुहोस्

नाबालिग बलात्कारको मुद्दा कमजोर बनाउन महान्यायाधिवक्ताको निर्लज्ज हस्तक्षेप, नमानेपछि सरुवा !

बलात्कारका अभियुक्त जोगिने गरी मुद्दा कमजोर बनाउन नमान्दा सरुवा गरियो– थोकर [भिडियोसहित]

समितिले सो मुद्दाका विषयमा देखिएका तथ्यगत अवस्था र सम्बन्धित सरकारी वकील तथा महान्यायाधिवक्ताको कार्यालयका सरकारी वकीलको संलग्नतालगायत उठेका अन्य विषयमा सम्बन्धित मिसिल कागज अध्ययन गर्नेछ । साथै समितिले सम्बन्धित सरकारी वकील तथा आवश्यक देखिएका अन्य व्यक्तिसँग बुझेर छानबिन गरी सत्यतथ्य र सुझावसहितको प्रतिवेदन पेश गर्नेछ । 

महान्यायाधिवक्ताको कार्यालयले आइतवार विज्ञप्ति जारी गर्दै अदालतमा विचाराधीन रहेको मुद्दाका विषयमा दबाब र प्रभावमा पारेको भन्ने भनाइलाई अपुष्ट भनेको छ । 

तर, सो मुद्दाकी अभियोजनकर्ता जिल्ला सरकारी वकिल कार्यालय ललितपुरकी सहायक जिल्ला अधिवक्ता संगीता थोकरले दबाब नमानेर सफल अभियोजन तथा बहस गरेर प्रतिवादीलाई थुनामा पठाउन भूमिका खेलेपछि आफ्नो अन्यत्र सरुवा गरिएको बताएकी थिइन् । थोकरलाई असार २ गते ललितपुरबाट सरुवा गरेर मुख्य न्यायाधिवक्ताको कार्यालय हेटौंडा पठाइएको छ ।